جەلىدە جەتىسۋ وبلىسىندا اۋداندىق ءماسليحات دەپۋتاتى داۋرەن سلياموۆتى ءۇشارال قالاسىندا پىشاقتاپ كەتكەنى تۋرالى اقپارات تارادى.مۇنى وبلىستىق پوليسيا دەپارتامەنتىنىڭ باسپا ءسوز قىزمەتى راستادى.
«15 قاڭتار كۇنى ساعات 15:25-تە الاكول اۋداندىق پوليسيا بولىمىنە ءۇشارال قالاسىندا سالىنىپ جاتقان قۇرىلىس نىسانداردىڭ بىرىندە ىشىمدىك ىشكەن ازامات جۇمىسشىلارعا ءتيىسىپ جاتقانى تۋرالى حابار ءتۇستى. كۇدىكتى 24 جاستاعى جەرگىلىكتى تۇرعىن جۇمىسشىلاردى قورعاماقشى بولعان 34 جاستاعى ەر ادامدى پىشاقتاپ، وقيعا ورنىنان قاشىپ كەتكەن»، - دەپ حابارلادى پوليسيا.
وقيعا ورنىنا بەس مينۋت ىشىندە جەتكەن پوليسيا قىزمەتكەرلەرى كۇدىكتىنى ۇستادى. الايدا داۋرەن سلياموۆ العان جاراقاتىنان جەدەل جاردەم كولىگىندە كوز جۇمدى.
ۇستالعان كۇدىكتى الاكول اۋداندىق پوليسيا ءبولىمىنىڭ ۋاقىتشا ۇستاۋ يزولياتورىنا قامالدى. اتالعان فاكتى بويىنشا قىلمىستىق ءىس قوزعالىپ، قاجەتتى ساراپتامالار تاعايىندالدى.