مەملەكەت باسشىسىنىڭ بيىلعى جولداۋى – ەلىمىزدەگى قاراپايىم ەڭبەك ادامدارى ءۇشىن ۇلكەن سەرپىلىس بولدى. پرەزيدەنتىمىزدىڭ 2025 جىلدى «جۇمىسشى ماماندىقتارىنىڭ جىلى» دەپ جاريالاۋى – كاسىبي ءبىلىم مەن تەحنيكالىق ماماندىقتارعا جاڭا سەرپىن بەرەتىن، ەڭبەكتىڭ ءقادىرىن ارتتىراتىن ماڭىزدى قادام. بۇل باستاما – ەلىمىزدەگى وندىرىستىك، اۋىل شارۋاشىلىق، قۇرىلىس، كولىك جانە وزگە دە سالالاردا ايانباي ەڭبەك ەتىپ جۇرگەن مىڭداعان جۇمىسشى مامانداردىڭ مارتەبەسىن ارتتىرۋ جولىنداعى جارقىن باستاۋ ەكەنى ءسوزسىز.
وسىنداي يگى باستامالار كاسىبي-تەحنيكالىق ءبىلىم بەرۋ وشاقتارىنىڭ دا جاۋاپكەرشىلىگىن ارتتىرىپ وتىر. 55 جىلدىق تاريحى بار الماتى قۇرىلىس-تەحنيكالىق كوللەدجى – ەلىمىزدىڭ ەكونوميكالىق دامۋىنا سەرپىن بەرەتىن بىلىكتى مامانداردى دايارلاۋ ىسىندە ايتارلىقتاي ۇلەس قوسىپ كەلە جاتقان ءبىلىم ورداسى. كوللەدج قابىرعاسىندا بۇگىندە 9 ءتۇرلى ماماندىق بويىنشا ءبىلىم الۋشىلار زامان تالابىنا ساي ءبىلىم مەن تاجىريبەنى قاتار مەڭگەرىپ، باسەكەگە قابىلەتتى مامان بولىپ قالىپتاسىپ كەلەدى.
جۋىردا «جۇمىسشى ماماندىقتارىنىڭ جىلى» اياسىندا وتكەن «قازاقستان كوللەدجدەرىنىڭ ۇزدىك 100 ستۋدەنتى» رەسپۋبليكالىق بايقاۋىندا كوللەدجىمىزدىڭ ستۋدەنتى، «دانەكەرلەۋ ءىسى» ماماندىعىنىڭ وكىلى شاباروۆ نۇرلىبەك بايعالييەۆيچ ۇلكەن جەتىستىككە قول جەتكىزدى. بۇل جەڭىس – ءبىر عانا ستۋدەنتتىڭ ەمەس، بۇكىل ۇجىمنىڭ، ۇستازدار مەن ستۋدەنتتەردىڭ ورتاق ەڭبەگىنىڭ جەمىسى. 
نۇرلىبەكتىڭ جەتىستىگى – كاسىبي ماماندىقتىڭ بەدەلىن ارتتىرۋعا قوسىلعان ۇلكەن ۇلەس. ول بايقاۋ بارىسىندا ءوزىنىڭ ماماندىعىنا دەگەن سۇيىسپەنشىلىگىن، كاسىبي شەبەرلىگى مەن كەلەشەككە دەگەن سەنىمىن بارىنشا كورسەتە ءبىلدى. بۇگىنگى تاڭدا دانەكەرلەۋ ءىسى – ەلىمىزدە جوعارى سۇرانىسقا يە، اسا قاجەتتى جانە تابىستى ماماندىقتاردىڭ ءبىرى. مەتالدى دانەكەرلەۋ – شەبەرلىكتى، دالدىكتى، شىدامدىلىق پەن ۇقىپتىلىقتى قاجەت ەتەتىن، ناعىز ونەر دەپ ايتۋعا تۇرارلىق جۇمىس.
ءبىزدىڭ كوللەدج ستۋدەنتتەرى وندىرىستىك تاجىريبەدەن Krones سىندى ءىرى كومپانيالاردا ءوتىپ، كاسىبي ماشىقتارىن شىڭداۋدا. تاماق ونەركاسىبىنە ارنالعان جابدىقتاردى ساپالى دانەكەرلەپ، ەل ەكونوميكاسىنىڭ دامۋىنا ءوز ۇلەستەرىن قوسىپ جاتقاندارى – ۇستاز ءۇشىن ەڭ ۇلكەن ماقتانىش.
بۇگىنگى جاھاندانۋ داۋىرىندە ۋاقىت تالابىنا ساي ساپالى مامان بولۋ – زور جاۋاپكەرشىلىك. بۇل جولدا ءاربىر ستۋدەنت ۇزدىكسىز ىزدەنىپ، ءوز ءبىلىمىن دامىتىپ، تاڭداعان ءىسىن سۇيە ءبىلۋى ءتيىس. كاسىپكە ادالدىق پەن ەڭبەككە دەگەن ماحاببات – تابىستى بولاشاقتىڭ نەگىزى.
«ەڭ وڭاي جۇمىس – ءوزىڭ سۇيەتىن ءىس» دەمەكشى، مەن جاس ۇرپاققا مىنا ءبىر قاراپايىم، ءبىراق اسا ماڭىزدى ويدى جەتكىزگىم كەلەدى: ماماندىق تاڭداۋ – تابىسقا جەتۋدىڭ جولى ەمەس، ءوزىڭدى تابۋدىڭ جولى. اقشا مەن اتاق ەمەس، قىزىعۋشىلىق پەن نيەت شىنايى جەتىستىككە جەتەلەيدى. ءار ماماندىقتىڭ ءوز ءقادىرى، ءار ەڭبەك ادامىنىڭ ءوز ورنى بار.
ءبىز، ۇستازدار قاۋىمى، ەل بولاشاعىن تاربيەلەپ وتىرعانىمىزدى تەرەڭ سەزىنەمىز. بولاشاق – ەڭبەكقور، ءبىلىمدى، كاسىبي شەبەر مامانداردىڭ قولىندا. سوندىقتان ءار ماماندىق يەسىن قۇرمەتتەپ، جاستاردى كاسىپتىك بىلىمگە باۋلىپ، ەڭبەككە تاربيەلەۋ – باستى مىندەتىمىز.
الماتى قۇرىلىس - تەحنيكالىق كوللەدجىنىڭ
ارنايى ءپان وقىتۋشىسى وسپانوۆا نازىم ءۋاليحان قىزى