قىرعىز پرەزيدەنتىنىڭ ءبىرجان قالدىبايەۆقا ارعىماق سىيلاۋى الەۋمەتتىك جەلىدە الۋان اڭگىمەگە ارقاۋ بولدى.
بۇدان بۇرىن ايتىس اقىندارى مەن جىرشى - تەرمەشىلەر وداعى ءتوراعاسىنىڭ ءبىرىنشى ورىنباسارى امانجول التايەۆتىڭ پىكىرىن ۇسىنعانبىز.
كەشە وسىعان قاتىستى قىرعىز پرەزيدەنتى امانجول التايەۆقا جاۋاپ بەرگەنىن حابارلادىق.
بۇگىن ءسوز ءقادىرىن تۇسىرمەگەن قازاقتىڭ قوس اقىنىنىڭ امانجول التايەۆتى قولداعان پىكىرىن ۇسىنامىز.
اقىن، حالىقارالىق «الاش» ادەبي سىيلىعىنىڭ لاۋرەاتى عالىم جايلىباي ءوزىنىڭ فب پاراقشاسىندا بىلاي دەپ جازدى:
...قىرعىزعا بارىپ "ارناۋ" ايتىپ، قاسيەتتى جىردىڭ بايراعىن بيىك كوتەرە الماعان باۋىرىمىزعا قاراتىپ ايتقان امانجول التايەۆتىڭ سىن پىكىرىنە بايلانىستى الەۋمەتتىك جەلىدە ءتۇرلى پىكىرلەر جازىلىپ جاتىر. ءبىزدىڭ حالىق ءتىپتى ءسوز ۇعۋدان قالعان با دەپ قالدىم. ەسكەرتپە، سىن ايتۋدىن دا ءجون-جوباسى، مادەنيەتى بولادى. قازاق ايتىس ونەرىنىڭ قايتالانباس تۇلعالارىنىڭ ءبىرى، اردا ازامات، قايراتكەر ءىنىم امانجول ايتسا " ءسوز اراسى بوتەن سوزبەن بىلعانباعانىن" قالاعاننان ايتتى. ولەڭ-ىرعاق پەن ۇيلەسىمنىڭ، وبراز بەن سۋرەتتىڭ، ۇيقاس پەن سۇلۋلىقتىڭ كورىگىنەن شىققاندا عانا ولەڭ. جاياۋ كەلدىم، باياۋ كەلدىم دەپ سىدىرتا بەرۋ كىمگە ابىروي اپەرەدى؟
امانجول بۇل جەردە قازاق ولەڭىنىڭ ابىرويى ءۇشىن ايتىپ تۇر. "تۇلپار مىنگەندى قىزعاندى" دەگەن نە سۇمدىق؟ سوڭىنا ەرگەن جىگىتكە ولجا سالىپ، سان تۇلپاردى ءوزى دە ازاماتتارعا مىنگىزىپ جۇرگەن جوق پا؟ امانجول باۋىرىمدى عۇمىر بويى بىلەتىن اعاسى رەتىندە ونىڭ جانىنىڭ جارىعىن، تابيعي دارىنىن، ادامي قالىبىن جاقسى تۇيسىنەمىن. سان جوق-جىتىككە كومەك قولىن سوزعانىنا دا كۋامىن.
"اقىن ءولتىرۋ ويىنى" ويىن بىتكەننىڭ جامانى، ارداقتى اعايىن! پىكىر ايتاردا ساق بولايىقشى!
كەشە عانا 165 جىلدىعىن تويلاعان ءماشھۇر ءجۇسىپ اۋليە بىلاي دەگەنى بار: " بۇرىنعى ورنەكتى حان، ۇلگىلى بيلەردىڭ سوزدەرىن ايتۋشى دا تاۋسىلدى، شىن قۇلاقپەن تىنداۋشى دا تاۋسىلدى. ەندى سۇم جالعاننىڭ سۇمدىق ءسوزى. ەل توزىعى جەتىپ،سوزدەن ازعاندىق بەلگىسى - وسى.
قۇرتتاي بالا كۇنىمىزدە اق ساقالدى قاريالار ايتىپ وتىرۋشى ەدى:
- ايتايىن دەسەڭ، تىنداۋشى جوق؛ تىڭدايىن دەسەڭ، ايتۋشى جوق! - دەپ. "قۇلاق ەستىگەندى كوز ءبىر كورمەك. "سونى، مىنە، ءبىز بۇل كۇندە كورىپ وتىرمىز."
ءيا، سولاي...
ال تومەندەگى جازبا ق ر پارلامەنت ءماجىلىسىنىڭ دەپۋتاتى، اقىن جاناربەك ءاشىمجاننىڭ فب پاراقشاسىنان الىندى:
امانجول ءالتاي — استىنداعى جالعىز اتىن ءتۇسىپ بەرىپ، جۇگەن ۇستاپ قالاتىننىڭ ناعىز ءوزى. قانشاما ساپارلاردا بىرگە ءجۇرمىز، قىزعانىشتىڭ قىزىل يتىنەن ادا، "كىسىگە بولسا ەكەن" دەپ جۇرەتىن جومارت بولمىسىنا ءسات سايىن كۋامىز.
بارماقتاي كەزىنەن اتامۇرا ايتىس ونەرىنىڭ دامۋىنا دامىلسىز قىزمەت ەتىپ كەلە جاتقان ازامات!
ءسوز ونەرىنە كولەڭكە تۇسسە جانىن جالاۋ، ارىن الاۋ ەتەتىن عالىم!
ۇلتتىق مۇراتتاردىڭ اۋلاسىنا ۇرى تۇسسە اتويلاپ شىعاتىن قايراتكەر!
ءاعا-ىنى بولىپ سىيلاسىپ جۇرگەنىمىزگە دە ون جىلدان اسا ۋاقىت بولىپتى.
وتە بايسالدى، ۇستامدى، مادەنيەتتى.
بولمىسى نازىك كورىنگەنىمەن، ادىلەتسىزدىككە، قاراۋلىققا جانى توزبەيدى.
كەسىپ، ءپىشىپ تۋراسىن ايتادى.
ال اۋجەكەڭنىڭ الەۋمەتتىك جەلىدە ايتقان اق-ادال ءسوزىن وي-قىرعا الىپ قاشىپ "ارناۋ ايتقان جىگىتكە مىنگىزگەن اتتى قىزعانىپتى" دەپ ايىپتاۋ — سوقىردان كوز، مىلقاۋدان ءتىل سۇراپتى دەگەنمەن بىردەي عوي…
قازاق جۇرتى سۇيەگىنە ءسوز سىڭگەن حالىق قوي.
تۋرا ايتپاق تۇگىل ەمەۋرىنمەن ايتىلعان ءسوزدىڭ استارىنداعى استاڭ-كەستەڭ اعىستارىن سەزىپ، ءبىلىپ، باعا بەرىپ وتىرادى.
ال قۇدايشىلىعىنا كەلسەك، كەشەگى ءسوزدىڭ اتاسى ءولىپ بارا جاتقاندا ايتقان اۋجەكەڭنىڭ سىنى دا، تىلەگى دە ورىندى.