تاسپانىڭ ءتۇسىرىلىمى الماتى، الماتى وبلىسىنىڭ قالالارى جانە اتىراۋدا ماحامبەت وتەمىس ۇلى كەسەنەسىنىڭ جانىندا ءوتتى
دارەجان ومىربايەۆتىڭ «اقىن» ءفيلمى 10-20 قاراشا ارالىعىندا پورتۋگاليادا وتكەن Lisbon & Sintra Film Festival 2022 (LEFFEST) كينوفەستيۆالىندە باس جۇلدەنى جەڭىپ الدى، دەپ حابارلايدى Almaty-akshamy.kz.
فيلم مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى مەن ۇلتتىق كينونى قولداۋ مەملەكەتتىك ورتالىعىنىڭ قاتىسۋىمەن ءتۇسىرىلدى.
«اقىن» فيلمىندە تەحنولوگيانىڭ دامۋ داۋىرىندە تۇسىنىكسىز جانە ماڭىزدى ەمەس ادام بولۋدان قورقاتىن اقىن تۋرالى باياندالادى. سەناريي نەمىس جازۋشىسى گەرمان گەسسەنىڭ «اۆتورلىق كەش» اڭگىمەسىنە نەگىزدەلگەن. تاسپانىڭ ءتۇسىرىلىمى الماتى، الماتى وبلىسىنىڭ قالالارى جانە اتىراۋدا ماحامبەت وتەمىس ۇلى كەسەنەسىنىڭ جانىندا ءوتتى. باستى كەيىپكەردى بەلگىلى ءانشى جانە مۋزىكانت ەردوس قانايەۆ سومدادى»، - دەپ حابارلادى «قازاقفيلم» كينوستۋدياسىنىڭ باسپا ءسوز قىزمەتىنەن.
ەسكە سالساق، ءفيلمنىڭ الەمدىك پرەمەراسى 2021 جىلى جاپونياداعى 34ء-شى توكيو حالىقارالىق كينوفەستيۆالىنىڭ باستى بايقاۋىندا ءوتتى. وندا فيلم «ۇزدىك رەجيسسۋرا» نوميناسياسى بويىنشا ماراپاتتالدى. كەيىن فيلم گەرمانياداعى 72ء-شى بەرلين حالىقارالىق كينوفەستيۆالىندە بايقاۋدان تىس كورسەتىلدى. سونداي-اق، «اقىن» برازيلياداعى Olhar de Cinema حالىقارالىق كينوفەستيۆالىندە «ۇزدىك فيلم» سىيلىعىن جەڭىپ العان بولاتىن.
قازاقستاندا كينو كارتينا وسى جىلدىڭ ءساۋىر ايىندا شەكتەۋلى پروكاتقا شىعارىلدى. سونداي-اق، 14 جەلتوقساننان باستاپ «اقىن» فرانسيا كينوتەاترلارىندا پروكاتقا شىعاتىنى بەلگىلى بولدى.