ەقىۇ قازاقستاندا وتكەن پرەزيدەنت سايلاۋىنا باعا بەردى

ميسسيانىڭ باعالاۋىنشا، سايلاۋ تىنىش جاعدايدا ءوتتى

ەۋروپاداعى قاۋىپسىزدىك جانە ىنتىماقتاستىق ۇيىمى (ەقىۇ) بيۋروسىنىڭ دەموكراتيالىق ينستيتۋتتار جانە ادام قۇقىقتارى جونىندەگى ميسسيا باسشىسى ۋرشۋلا گاسەك قازاقستانداعى پرەزيدەنت سايلاۋىن باقىلاۋ ناتيجەسىن تانىستىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ميسسيا باسشىسىنىڭ مالىمدەۋىنشە، قازاقستاندا پرەزيدەنت سايلاۋى ءتيىمدى ۇيىمداستىرىلدى.

الايدا، سايلاۋدا شىنايى ءپليۋراليزمدى قامتاماسىز ەتۋ ءۇشىن رەفورمانى ودان ءارى جالعاستىرۋ قاجەت.

سونداي-اق ەقىۇ بيۋروسىنىڭ دەموكراتيالىق ينستيتۋتتار جانە ادام قۇقىقتارى جونىندەگى ميسسيا مالىمدەمەسىندە سايلاۋ بارىسى جايلى اقپاراتتار باق-تا كەڭىنەن جاريالانعانى ايتىلدى.

«ورتالىق سايلاۋ كوميسسياسى سايلاۋعا دايىندىق پروسەسىن ءتيىمدى باسقارىپ وتىردى جانە قاراماعىنداعى جەرگىلىكتى سايلاۋ كوميسسيالارىن جان-جاقتى وقىتۋدى قامتاماسىز ەتتى»، - دەدى ۋرشۋلا گاسەك ەلوردادا وتكەن باسپا ءسوز ءماسليحاتىندا.

ميسسيانىڭ باعالاۋىنشا، سايلاۋ تىنىش جاعدايدا ءوتتى. داۋىس بەرۋ كەزىندە ءتيىستى پروسەدۋرالار ساقتالدى.

ميسسيا مۇشەلەرى 1 131 ۋچاسكەدە داۋىس بەرۋ پروسەسىن باقىلاعان، سونىڭ 95%-نا وڭ باعاسىن بەردى.

ودان بولەك، ۋ. گاسەكتىڭ ايتۋىنشا، سايلاۋ بارىسىن ميسسيا اتىنان ەلىمىزدىڭ ءار وڭىرىندە 300-گە جۋىق بايقاۋشى قاداعالادى.