الماتىدا وتباسىلاردى قولداۋ مودەلى ءتۇسىندىرىلدى.
«مەملەكەتتىك الەۋمەتتىك ساقتاندىرۋ قورى» اق الماتى قالاسى بويىنشا فيليالىنىڭ ديرەكتورى ءلاززات ساعىنبەكوۆا وڭىرلىك كوممۋنيكاسيالار قىزمەتىنىڭ بريفينگىندە سويلەگەن سوزىندە بالا كۇتىمى كەزەڭى 1 جاستان 1،5 جاسقا دەيىن وسەتىنىن حابارلادى. بۇل مەملەكەت باسشىسىنىڭ ءوز جولداۋىندا ايتقان باستاماسىنىڭ ناتيجەسىندە بولادى، دەپ حابارلايدى Almaty-akshamy.kz.
ءلاززات ساعىنبەكوۆانىڭ ايتۋىنشا، بۇگىندە بالالى وتباسىلاردى قولداۋ مودەلى مەملەكەتتىك جاردەماقىلار مەن تولەمدەردىڭ 6 ءتۇرىن قامتيدى. الەۋمەتتىك كودەكس جوباسىندا وسى الەۋمەتتىك قولداۋ شارالارىنىڭ بارلىعى تولىق ساقتالعان. الايدا، وتباسىنىڭ جەكەلەگەن ساناتتارىن قولداۋدىڭ قولدانىستاعى شارالارىن كۇشەيتۋگە باعىتتالعان ءبىرقاتار جاڭالىقتار ەنگىزىلۋدە.
«ەڭ نەگىزگىلەرىنىڭ ءبىرى – بالا كۇتىمى بويىنشا جاردەماقى تولەۋ مەرزىمىن ءبىر جىلدان ءبىر جارىم جاسقا دەيىن ۇلعايتۋ. وسى رەتتە، اتالعان نورما جۇمىس ىستەيتىن جانە جۇمىس ىستەمەيتىن اتا-انالارعا دا قولدانىلادى. بۇل قۇقىقتى جارتى ميلليونعا دەيىن اتا-انا پايدالاناتىن بولادى. وعان قوسا، بالا كۇتىمى بويىنشا جاردەماقى الۋعا ۇمىتكەر ءاربىر اتا-انا ونىڭ الەۋمەتتىك ساقتاندىرۋ جۇيەسىنە قاتىسۋ ءوتىلى نەعۇرلىم كوپ بولسا، تولەم مولشەرى سوعۇرلىم جوعارى بولاتىنىن بىلۋگە ءتيىس. بۇل تولەم بۇگىندە ءماسق-عا اۋدارىمدار جۇرگىزىلگەن تابىستىڭ 40%-ىن قۇرايدى»، - دەپ حابارلادى وكق سپيكەرى.
ال جۇمىس ىستەمەيتىن نەمەسە بالا تۋىلعانعا دەيىنگى سوڭعى ەكى جىلدا 6 ايدان كەم جۇمىس ءوتىلى بار اتا-انالار جاردەماقى مەن تولەمدەرگە تەك مەملەكەتتىك بيۋدجەتتەن عانا ۇمىتكەر بولا الادى.
«بۇگىندە، بالا كۇتىمىن اتقاراتىن اتا-انا ەڭبەك قىزمەتىن قايتا باستاعان جاعدايدا، بالا كۇتىمىنە تولەنەتىن جاردەماقى توقتاتىلۋعا قاجەت. جاڭا كودەكس بويىنشا وسى ساناتتاعى وتباسىلاردى قولداۋ ءۇشىن تولەمدەر توقتاتىلمايدى جانە رەسپۋبليكالىق بيۋدجەتتەن تولەنەتىن جاردەماقى مولشەرىنە سايكەس تولەنەدى»، - دەپ ءتۇسىندىردى سپيكەر.
سونداي-اق، مەملەكەت باسشىسىنىڭ تاپسىرماسى بويىنشا 2022 جىلعى 1 قىركۇيەكتەن باستاپ پيلوتتىق رەجيمدە وتباسىنىڭ سيفرلىق كارتاسىن ەنگىزۋ باستالدى.
«كارتا – بۇل ازاماتتاردىڭ الەۋمەتتىك مارتەبەسىنە بايلانىستى كەپىلدى مەملەكەتتىك قولداۋدىڭ قانداي دا ءبىر ءتۇرىن الۋعا قۇقىقتارى تۋرالى ولاردىڭ كۇن سايىنعى «ەلەكتروندىق حابارلاۋشىسى». مەملەكەتپەن قىزمەت كورسەتۋدىڭ پرواكتيۆتى فورماتىنىڭ تاعى ءبىر جاڭا قۇرالى. ياعني، مەملەكەت اقپاراتتىق جۇيە ارقىلى ازاماتقا ءتيىستى ورگاندارعا جۇگىنۋ قاجەتتىلىگىنسىز مەملەكەتتىك قولداۋدىڭ قانداي دا ءبىر ءتۇرىن الۋدى ءوزى ۇسىناتىن بولادى»، - دەدى ل. ساعىنبەكوۆا.
باستاپقى كەزەڭدە مەملەكەتتىك ورگانداردىڭ اقپاراتتىق جۇيەلەرىنىڭ دەرەكتەرى نەگىزىندە وتباسىلاردىڭ ءال-اۋقاتىنىڭ دەڭگەيىن جانە ولارعا ءتيىستى مەملەكەتتىك قولداۋ شارالارىن ايقىنداۋ بويىنشا جۇمىس جۇرگىزىلدى.
ءقازىردىڭ وزىندە سيفرلىق كارتادا شامامەن 6 ملن وتباسى مەن ونىڭ 19 ملن مۇشەسى تۋرالى دەرەكتەر بار جانە «وتباسى پورترەتى» دەپ اتالاتىن مالىمەتتەر قالىپتاستىرىلدى. كارتا دەرەكتەرى وتباسى جانە ونىڭ مۇشەلەرى مارتەبەسىنىڭ وزگەرۋىنە قاراي جاڭارتىلادى.
مەملەكەتتىك قولداۋ شارالارىن الۋ قۇقىعى انىقتالعان كەزدە الەۋەتتى الۋشىعا مەملەكەتتىك قىزمەت كورسەتۋگە كەلىسىم الۋ ءۇشىن سمس-حابارلاما جىبەرىلەدى.
كەلىسىم العاننان كەيىن – الەۋمەتتىك جاردەماقى، تولەمدەر نەمەسە مەملەكەتتىك قولداۋدىڭ باسقا تۇرلەرى تاعايىندالىپ، كەيىننەن الۋشىنىڭ بانك شوتىنا اۋدارىلادى.
جوبا كەزەڭ-كەزەڭمەن جۇزەگە اسىرىلادى:
- 2022 جىلعى 1 قىركۇيەكتەن باستاپ جاردەماقىلار مەن الەۋمەتتىك تولەمدەردىڭ 9 ءتۇرى بويىنشا جاڭا فورماتتا قىزمەتتەر الۋ مۇمكىندىگى ۇسىنىلدى؛
– 2023 جىلعى 1 قاڭتاردان باستاپ تىزبە الەۋمەتتىك قورعاۋ سالاسىنداعى قىزمەتتەرمەن كەڭەيتىلەتىن بولادى؛
- 2024 جىلعى 1 قاڭتاردان باستاپ دەنساۋلىق ساقتاۋ جانە ءبىلىم بەرۋ سالالارىنداعى مەملەكەتتىك كەپىلدىكتەر ەنگىزىلەتىن بولادى؛
- 2025 جىلدان باستاپ مەملەكەتتىك كەپىلدىكتەردىڭ بارلىق تۇرلەرى قامتىلاتىن بولادى.