اقتوبە وبلىستىق ءماسليحاتىنىڭ دەپۋتاتى، كاسىپكەر سامات قالدىعۇلوۆ سۋ تاسقىنى كەزىندە باسپاناسى سۋعا كەتكەن تۇرعىندارعا كومەك قولىن سوزعىسى كەلەتىنىن ايتتى.
ول تۋعان جەرى – العا اۋدانى امانكەلدى اۋىلىنان سۋ تاسقىنىنان زارداپ شەككەن 10 وتباسىعا ءۇي تارتۋ ەتپەك، دەپ حابارلايدى Almaty-akshamy.kz.
دەپۋتاتتىڭ ايتۋىنشا، اۋىلدا مال باعۋ ارقىلى مول تابىس تابۋعا بولادى. بۇگىندە اتالعان اۋىلدا مەكتەپ، كلۋب، فەلدشەرلىك پۋنكت بار. مەكەمەلەر ينتەرنەتكە قوسىلعان.
«بيىلعى سۋ تاسقىنى كەزىندە قالادا قانشاما وتباسىنىڭ باسپاناسىنا سۋ كىرىپ، ابىگەرگە ءتۇستى. ءقازىر ولارعا مەملەكەت تاراپىنان قاجەتتى كومەك كورسەتىلىپ جاتىر. دەگەنمەن مەنىڭ ۇسىنىسىم وسى: قالادا جەكە باسپاناعا قولى جەتپەي جۇرگەندەرگە نەمەسە قيىندىقتارعا تاپ بولعان وتباسىلارعا قولداۋ بىلدىرگىم كەلەدى. ولارعا ءوز قارجىمنان ءۇي تارتۋ ەتۋگە دايىنمىن. جۇمىسپەن دە قامتاماسىز ەتەمىن»، دەيدى دەپۋتات.
اقتوبە وبلىسى اكىمدىگىنىڭ مالىمەتىنشە «رەيمقۇل» شق ۇجىمىنىڭ كۇشىمەن امانكەلدى اۋىلىندا مونشا سالىنىپ، مەكتەپ عيماراتى جوندەلگەن. 86 ميلليون تەڭگەدەن استام سوماعا سۋ قۇبىرى جۇيەسى تولىعىمەن جاڭارتىلىپ، ەلەكتر سورعىلارى اۋىستىرىلعان. مادەنيەت ءۇيى دە سالىنعان. اۋدان ورتالىعىنان 60 شاقىرىم قاشىقتىقتا ورنالاسقان اۋىلدا باقشا ەگىپ، مال باعۋعا مۇمكىندىك مول.