جەڭىمپازدار وسكەمەندە وتەتىن ءىىم كۋبوگىنە قاتىسادى
اقتوبەدەگى 66/55 اسكەري بولىمىندە تەراكت كەزىندە قازا بولعان اسكەريلەردى ەسكە الۋعا ارنالعان بىرىنشىلىك باستالدى. جەڭىمپازدار وسكەمەندە وتەتىن ءىىم كۋبوگىنە قاتىسادى، دەپ حابارلايدى Almaty-akshamy.kz قازاقپارات-قا سىلتەمە جاساپ.
2016 جىلدىڭ 5 ماۋسىمى كۇنى بولعان تەرروريستىك اكت كەزىندە ۇلتتىق ۇلاننىڭ 66/55 بولىمىندە ءۇش ادام كوز جۇمدى . ولاردىڭ ەكەۋى اسكەري قىزمەتكەر بولسا، بىرەۋى سارباز. بۇگىن ەسكە الۋ شاراسى بولىپ، سامبودان ەل بىرىنشىلىگى باستالدى.
«بيىل باۋىرىمىزدىڭ قازا بولعانىنا 6 جىل بولدى. ارينە، ورنى ويسىراپ قالدى. اسىرەسە اناسىنا قاتتى سوقتى. ەسكە الىپ، جارىس ۇيىمداستىرىپ جاتقان اسكەري بولىمشەگە راحمەت ايتامىن. الداعى ۋاقىتتا دا ۇمىتپايدى دەپ ويلايمىن»، - دەدى مارقۇم بەرىك قالييەۆتىڭ اعاسى جۇماجان قالييەۆ.
66/55 اسكەري بولىمىندە جاعداي مۇلدە وزگەردى. كۇزەت بولىمىنەن باستاپ قاۋىپسىزدىك كۇشەيتىلگەن.
«ۇلتتىق گۆارديا ۇنەمى قىراعى. ءبىز كەز كەلگەن ۋاقىتتا تويتارىس بەرىپ، قارسى تۇرۋعا دايىن وتىرامىز. مىندەت وسى. قازىرگى ۋاقىتتا جەكە قۇرام كۇزەتتە قارۋمەن تۇرادى. قارۋمەن قىزمەت اتقارادى. تەراكت وقيعاسى كەزىندە قورقىنىش بولعان جوق. شابۋىل كەزىندە ولار قارۋ-جاراق الۋ ماقساتىن كوزدەدى. ءبىز توتەپ بەرە الدىق»، - دەدى 66/55 اسكەري ءبولىم كومانديرى ميراس تۇرالين.
ەسكە الۋ كەزىندە سول كۇنى جارالانىپ، وتادان سوڭ امان قالعان اسكەري قىزمەتكەر وتكەن كۇندەردى ەسكە الدى.
«66/55 اسكەري بولىمىندە 2013 جىلدان بەرى جۇمىس ىستەيمىن. 2016 جىلى 5 ماۋسىمدا اسكەري بولىمگە شابۋىل جاسالدى. سول كەزدە شابۋىلشىلارعا تويتارىس بەردىك. ارادا 6 جىل وتسە دە ءالى ءبارى كوز الدىمدا. مەن كەزەكشىلىكتە بولعان كۇنى ساعات 14:25 شاماسىندا 66/55 اسكەري بولىمىنە شابۋىل جاسالدى دەگەن حابارلاما راديو ارقىلى بەرىلدى. مەن اسكەري ءبولىمنىڭ اۆتوپارك اۋماعىندا كەزەكشى بولدىم. شابۋىلشىلار كەلگەندە قارۋ الىپ، تويتارىس بەردىك. مەنىڭ وكپە تۇسىما وق ءتيىپ جارالاندىم، سودان كەيىن ەسىمدى بىلمەيمىن. ەكى كۇننەن كەيىن رەانيماسيادا وياندىم. ۇزدىك قىزمەت اتقارعانىم ءۇشىن مەدال بەردى. ءقازىر ەندى اسكەري بولىمدە جاۋىنگەرلىك جاتتىعۋلار وتكىزىلىپ جاتىر»، - دەدى اعا جۇرگىزۋشى ەلامان جاندىلدايەۆ.
ايتىپ وتەيىك، سامبودان ەل بىرىنشىلىگى بيىل بەسىنشى رەت وتكىزىلىپ جاتىر. بۇل ىرىكتەۋ جارىسى بولىپ ەسەپتەلەدى. ق ر ۇلتتىق ۇلان سپورت كومانداسىنىڭ باستىعى ساتجان ابىشيەۆتىڭ ايتۋىنشا، قازان ايىندا وسكەمەن قالاسىندا ءىىم كۋبوگى بولادى. جەڭىمپازدار سول جارىستا ب ا ق سىنايدى.