الماتى اكىمى دارحان ساتىبالدى قالادا كوممۋنالدىق جارمەڭكەلەر قۇرۋ جوباسىن قاراستىرعان كەڭەس وتكىزدى.
قازىرگى ۋاقىتتا بىرنەشە ساۋلەتتىك جانە فۋنكسيونالدىق شەشىم پىسىقتالىپ جاتىر. ءار اۋداندا جاڭا جارمەڭكەلەردى ورنالاستىرۋعا ارنالعان الدىن الا ورىندار بەلگىلەندى. سونىمەن قاتار «الماتى» الەۋمەتتىك-كاسىپكەرلىك كورپوراسياسىنىڭ قولدانىستاعى پاۆيلوندارى زاماناۋي تالاپتارعا سايكەس جاڭعىرتۋ جوسپارى قاتار قاراستىرىلۋدا.
باستامانىڭ ماقساتى – دەلدالداردان باس تارتىپ، فەرمەرلەر ءۇشىن قولايلى جاعداي جاساۋ.
جوبا ساراپشىلارمەن جانە ءتيىستى قىزمەتتەرمەن بىرلەسىپ پىسىقتالاتىن بولادى. تالداۋ ناتيجەلەرى بويىنشا جارمەڭكەلەردىڭ وڭتايلى فورماتى، ونىڭ ىشىندە ينفراقۇرىلىمى، ورنالاستىرۋ ءتارتىبى جانە باعا بەلگىلەۋ تەتىكتەرى ۇسىنىلادى.
اكىمنىڭ ايتۋىنشا، قالانىڭ مىندەتى – اشىق ساۋدا جۇيەسىن قالىپتاستىرۋ، جەرگىلىكتى وندىرۋشىلەردى قولداۋ جانە ساتىپ الۋشىلار ءۇشىن قولايلى جاعداي جاساۋ.