اقتوبە الەۋمەتتىك-كاسىپكەرلىك كورپوراسياسىنىڭ بۇرىنعى باسقارما ءتوراعاسى ءارى اقتوبە وبلىسىنىڭ بۇرىنعى اكىمىنە ۇكىم شىقتى.
ەرمەك يمانتايەۆقا قىلمىستىق كودەكستىڭ 189-بابى 4-بولىگىنىڭ 2-تارماعى بويىنشا (سەنىپ تاپسىرىلعان بوتەن مۇلىكتى اسا ءىرى مولشەردە ۇرلاۋ) ايىپ تاعىلىپ، ءىس سوتتا قارالعان، دەپ حابارلايدى Almaty-akshamy.kz Ulysmedia.kz-كە سىلتەمە جاساپ.
سوتتا يمانتايەۆتىڭ اقتوبە اكك باسقارما ءتوراعاسى بولا تۇرا، «سادوۆوە» تۇرعىن ءۇي الابىندا ورنالاسقان كولەمى 24 گا جەر ۋچاسكەسىن، باعاسىن 10 ەسە ءتۇسىرىپ زاڭسىز تۇردە ساتقانى انىقتالعان.
“سوتتالۋشى جەردىڭ نارىقتىق قۇنىن قاساقانا 20 ملن تەڭگەگە دەيىن تومەندەتىپ، جەر ۋچاسكەسى تۋرالى جالعان اقپارات ۇسىنىپ، تولەمدىڭ جاسالماعانىنا قاراماستان، جالعان ساتىپ الۋشى س.-پەن زاڭسىز ساتىپ الۋ-ساتۋ كەلىسىمشارتىن جاساعان. ءارى قاراي، جەر ۋچاسكەسى جالعان تۇلعا س.-قا قايتا راسىمدەلىپ، جەردىڭ نىسانالى ماقساتى «جەكە تۇرعىن ءۇي قۇرىلىسىنان» «كوپقاباتتى تۇرعىن ءۇي قۇرىلىسىنا» وزگەرتىلدى. جالعان تۇلعا س.-پەن جەردىڭ 17،2 گا كولەمىندەگى بولىگى باتىس-3 مولتەك اۋدانىنداعى 4 جەر ۋچاسكەسىنە كەيىن تۇرعىن ءۇي سالۋشىلارىنا ساتۋ ءۇشىن ايىرباستالعان”، – دەپ حابارلايدى اقتوبە سوتى.
يمانتايەۆتىڭ تاپسىرماسىمەن جالعان تۇلعا س. جوعارىدا اتالعان باتىس-3 مولتەك اۋدانىنداعى 3 ۋچاسكەسى جانە «سادوۆوە» تۇرعىن ءۇي الابىنداعى قالعان 2،3 گا كولەمىندەگى جەر ۋچاسكەسى ءۇشىنشى تۇلعا ك.-گە قايتا راسىمدەلگەن. جەر ۋچاسكەسىن زاڭسىز ساتقان ە.يمانتايەۆ اق تۇلعاسى رەتىندە مەملەكەتكە 199،4 ملن تەڭگە سوماسىنا اسا ءىرى مولشەردە زالال كەلتىرگەن.
سوتتالۋشىنىڭ كىناسى كۋالاردىڭ ايعاقتارىمەن، ساراپتاما قورىتىندىلارىمەن جانە باسقا دا دالەلدەمەلەر جيىنتىعىمەن راستالعان. پروكۋرور سوتتان ە.يمانتايەۆقا مەملەكەتتىك قىزمەتتە قىزمەت ەتۋ قۇقىعىنان ءومىر بويىنا ايىرا وتىرىپ، 10 جىل مەرزىمگە باس بوستاندىعىنان ايىرۋ جازاسىن تاعايىنداۋدى سۇرادى.
سوتتالۋشى يمانتايەۆ وزىنە تاعىلعان ايىپپەن كەلىسپەگەن.
سوتتىڭ ۇكىمىمەن ەرمەك يمانتايەۆ كىنالى دەپ تانىلىپ، وعان مەملەكەتتىك قىزمەتتە قىزمەت ەتۋ قۇقىعىنان ءومىر بويىنا ايىرا وتىرىپ، 8 جىل مەرزىمىنە باس بوستاندىعىنان ايىرۋ جازاسى تاعايىندالدى. ازاماتتىق تالاپ قاناعاتتاندىرىلىپ، سوتتالعاننان مەملەكەت پايداسىنا 199،4 ملن تەڭگە ءوندىرىلدى. ۇكىم زاڭدى كۇشىنە ەنگەن جوق.