اقتوبە وبلىسىندا ەر ادامنان “سينتەتيكانىڭ” 2 مىڭعا جۋىق ءبىر رەتتىك دوزاسى تاركىلەندى
اقتوبە وبلىسىنىڭ پوليسياسى سينتەتيكالىق ەسىرتكىنىڭ 2 مىڭعا جۋىق ءبىر رەتتىك دوزاسىن ساتۋدىڭ جولىن كەستى، – دەپ حابارلايدى Polisia.kz.
اقتوبە وبلىسى پد ەسىرتكى بيزنەسىنە قارسى ءىس-قيمىل باسقارماسى قىزمەتكەرلەرى جەدەل-ىزدەستىرۋ ءىس-شارالارىن وتكىزۋ بارىسىندا 35 جاستاعى اقتوبەلىكتى ۇستادى.
تەرگەۋ ءىس-قيمىلدارىن جۇرگىزۋ بارىسىندا ۇستالعان ادامنان ۇنتاق زاتى بار 126 بايلام تاركىلەندى. ءارى قاراي، قىزمەتتىك ءيتتىڭ كومەگىمەن جالدامالى پاتەردى ءتىنتۋ بارىسىندا پوليسەيلەر ۇنتاق زاتى بار 10 zip-پاكەت تاركىلەدى.
ساراپتاما قورىتىندىسىنا سايكەس الىنعان زاتتار مەفەدرون پسيحوتروپتىق زاتى بولىپ شىقتى، جالپى سالماعى 275 گرامنان اسادى. بۇل 7 ملن تەڭگە سوماسىنا 2 مىڭعا جۋىق ءبىر رەتتىك دوزانى قۇرايدى.
ەسىرتكى قۇرالدارىن، پسيحوتروپتىق زاتتاردى، ولاردىڭ انالوگتارىن اسا ءىرى مولشەردە زاڭسىز ساقتاۋ فاكتىسى بويىنشا سوتقا دەيىنگى تەرگەپ-تەكسەرۋ باستالدى. وسى باپتىڭ سانكسياسى ءۇش جىلدان جەتى جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازانى كوزدەيدى.
كۇدىكتى ۋاقىتشا ۇستاۋ يزولياتورىنا قامالدى.