اقتاۋدا ەكى ەر ادام جانجال بارىسىندا پىشاق جاراقاتىمەن اۋرۋحاناعا ءتۇستى. پوليسيا كۇدىكتىنى ۇستادى، دەپ حابارلايدى Aqshamnews.kz ءتىلشىسى Lada.kz-كە سىلتەمە جاساپ.
وقيعا سەنبىگە قاراعان ءتۇنى 12-شاعىن اۋداندا بولعان. قۇقىق قورعاۋشىلار قىلمىس ورنىن قورشاۋعا الدى.
ماڭعىستاۋ وبلىستىق پوليسيا دەپارتامەنتىنىڭ مالىمەتىنشە، ەر ادامدار سپيرتتىك ىشىمدىك ءىشۋ كەزىندە جانجالداسىپ قالعان. سول ساتتە ەكەۋى پىشاق جاراقاتىن العان. جاراقات العاندار اۋرۋحاناعا جەتكىزىلدى.
پوليسيا كۇدىكتىنى انىقتاپ، قاماۋعا الدى. ءقازىر ول ۋاقىتشا ۇستاۋ يزولياتورىندا وتىر. اتالعان دەرەك بويىنشا دەنساۋلىققا قاساقانا زيان كەلتىرۋ بابىمەن سوتقا دەيىنگى تەرگەۋ باستالدى.