قازاقستاندا 2026 جىلى ايلىق ەسەپتىك كورسەتكىش (اەك) مولشەرى ۇلعايماق. بۇل ايىپپۇلداردىڭ كولەمىنە دە تىكەلەي اسەر ەتەدى، دەپ حابارلايدى Aqshamnews.kz.
قارجى مينيسترلىگى 2026–2028 جىلدارعا ارنالعان رەسپۋبليكالىق بيۋدجەت جوباسىن جاريالادى. قۇجات ۇكىمەتتىڭ ماقۇلداۋىنان ءوتىپ، پارلامەنت قاراۋىنا جولداندى. وندا ەڭ تومەنگى جالاقى، زەينەتاقى، كۇنكورىس مينيمۋمى جانە ايلىق ەسەپتىك كورسەتكىش سىندى نەگىزگى الەۋمەتتىك كورسەتكىشتەر قاراستىرىلعان. ادەتتە مۇنداي جوبالار قابىلدانعاندا كورسەتكىشتەر وزگەرىسسىز قالادى.
2026 جىلى اەك كولەمى 4 325 تەڭگەنى قۇرايدى. قازىرگى ۋاقىتتا بۇل كورسەتكىش 3 932 تەڭگەگە تەڭ.
اەك-تەگى وسىمگە بايلانىستى ايىپپۇلدار مولشەرى مىناداي بولادى:
- جىلدامدىقتى اسىرعانى ءۇشىن – 5 اەك نەمەسە 21 625 تەڭگە؛
- جول بەلگىلەرى مەن سىزىقتارىن ساقتاماۋ – 3 اەك نەمەسە 12 975 تەڭگە؛
- توقتاۋ نەمەسە تۇراق ەرەجەسىن بۇزۋ – 5 اەك نەمەسە 21 625 تەڭگە؛
- جاياۋ جۇرگىنشىلەردىڭ جول ەرەجەسىن بۇزۋى – 2 اەك نەمەسە 8 650 تەڭگە؛
- كولىك قۇرالدارىن پايدالانۋ ەرەجەسىن بۇزۋ – 5 اەك نەمەسە 21 625 تەڭگە؛
- قاۋىپسىزدىك بەلبەۋسىز نەمەسە موتوشلەمسىز جولاۋشى تاسىمالداۋ – 5 اەك نەمەسە 21 625 تەڭگە؛
- قىزىل شامعا ءوتۋ – 10 اەك نەمەسە 43 250 تەڭگە؛
- قوعامدىق ورىندا الكوگول ءىشۋ نەمەسە ماس كۇيدە ءجۇرۋ – 5 اەك نەمەسە 21 625 تەڭگە؛
- قوعامدىق ورىندى لاستاۋ – 10 اەك نەمەسە 43 250 تەڭگە؛
- مىندەتتى ساقتاندىرۋ زاڭىن بۇزۋ (زاڭدى تۇلعا ءۇشىن) – 300 اەك نەمەسە 1 297 500 تەڭگە.
وسىلايشا، 2026 جىلى ايىپپۇلداردىڭ كولەمى ەداۋىر وسەدى دەپ كۇتىلۋدە.