الماتى قالاسى اكىمىنىڭ ورىنباسارى بەيبىت شاحانوۆ ناۋرىزباي اۋدانىنداعى سالىنىپ جاتقان الەۋمەتتىك نىسانداردىڭ جاي-كۇيىمەن تانىسىپ قايتتى. ساپار بارىسىندا مەكتەپ، بالاباقشا مەن ەمحانانىڭ قۇرىلىس بارىسىن كورىپ شىقتى.
قۇرامىس شاعىناۋدانىندا اكىمنىڭ ورىنباسارى «Bazis Construction» ج ش س سالعان 1500 ورىندىق جايلى مەكتەپكە باردى. بەيبىت شاحانوۆ قۇرىلىس باسقارماسىنا مەكتەپتى ءبىلىم باسقارماسىنىڭ يەلەگىنە وتكىزۋدى جەدەلدەتىپ، 15 قىركۇيەككە دەيىن ينجەنەرلىك جانە كوممۋنيكاسيالىق جەلىلەردى ىسكە قوسۋ جۇمىستارىن تولىق اياقتاۋدى تاپسىردى.
سونداي-اق، وسى شاعىناۋدانداعى اۋىسىمىنا 500 ادام قابىلدايتىن ەمحانانىڭ قۇرىلىسىن كوردى. مۇندا «MIR-A Construction» ج ش س ءمونوليتتى جۇمىستار جۇرگىزىپ جاتىر. ساپار بارىسىندا اكىمنىڭ ورىنباسارى جۇمىسشىلار سانىن ارتتىرىپ، قۇرىلىس-مونتاج جۇمىستارىنىڭ قارقىنىن كۇشەيتۋدى مىندەتتەدى.
بۇعان قوسا، قۇرامىس پەن شۇعىلا شاعىناۋداندارىندا 320 ورىندىق بالاباقشالاردىڭ، سونداي-اق شۇعىلاداعى (ەڭبەك كوشەسى) 340 ورىندىق جاتاقحاناسى بار مەكتەپتىڭ قۇرىلىسىنا باسا نازار اۋدارىلدى. قۇرىلىس كومپانيالارىنىڭ مالىمەتىنشە، نىساندار شامامەن 70-85% دايىن. قۇرىلىس باسقارماسىنا جۇمىس ساپاسىن باقىلاۋدى كۇشەيتۋ تاپسىرىلدى. «استانا-سترويينۆەست» كورپوراسياسىنا قازان ايىنىڭ باسىنا دەيىن بالاباقشالاردى، ال ايدىڭ سوڭىنا دەيىن مەكتەپتى تولىق اياقتاۋ مىندەتتەلدى. سونىمەن قاتار، مەردىگەرگە جاسىل جەلەك پەن كوگالدى كۇتىپ-باپتاۋ ءۇشىن ءوز قاراجاتى ەسەبىنەن قوسىمشا اۆتوسۋارۋ جۇيەسىن ورناتۋ جۇكتەلدى.
«بالالار ءوزىنىڭ مەكتەبىنە تەزىرەك ورالۋى قاجەت. سونداي-اق، اۋماقتى اباتتاندىرۋ جانە كوگالداندىرۋعا ەرەكشە ءمان بەرۋ كەرەك. اعاش ەگىپ، بالالارعا ىڭعايلى ءارى اسەم اۋلا جاساڭىزدار»، – دەدى بەيبىت شاحانوۆ.
بالاباقشالاردى ارالاۋ بارىسىندا اكىمنىڭ ورىنباسارى بالالارعا جاسالىپ وتىرعان جاعدايعا توقتالىپ، ولاردىڭ قاۋىپسىزدىگى مەن جايلىلىعى باستى نازاردا بولۋى كەرەكتىگىن اتاپ ءوتتى.
الەۋمەتتىك نىسانداردىڭ قۇرىلىسى قالا اكىمدىگىنىڭ ۇنەمى باقىلاۋىندا. بۇل جوبالاردىڭ ۋاقىتىلى اياقتالۋى ناۋرىزباي اۋدانى تۇرعىندارىن زاماناۋي ءبىلىم بەرۋ جانە مەديسينالىق ينفراقۇرىلىممەن قامتاماسىز ەتۋدە ەرەكشە ماڭىزعا يە.