ازەربايجاننىڭ زاگاتالا قالاسىنىڭ تۇرعىنى نۋرۋللا سيرادجوۆ اقتاۋ ماڭىندا اپاتقا ۇشىراعان "ازەربايجان اۋە جەلىلەرى" (AZAL) ۇشاعىنىڭ جولاۋشىسى رەتىندە زارداپ شەككەن ەدى. ول 18 قازاندا تاڭەرتەڭ ءوز ۇيىندە قايتىس بولدى، - دەپ حابارلايدى aqshamnews.kz Lent.az-عا سىلتەمە جاساپ.
وقيعا كۇنى نۋرۋللا سيرادجوۆ جۇبايىمەن بىرگە گروزنىيعا بارا جاتقان. باسىلىمنىڭ ايتۋىنشا، ولار ۇلدارىن كورۋگە ۇشقان، سونىمەن قاتار، ەر ادام قاتەرلى ىسىككە قاتىستى وتا جاساتپاق بولعان. الايدا اپاتقا بايلانىستى وپەراسيا كەيىنگە قالعان. ەرلى-زايىپتى اۋىر جاراقات الىپ، باكۋدەگى اۋرۋحاناعا جەتكىزىلگەن. جاراقاتتان ايىققانىنا قاراماستان، سيرادجوۆ اۋرۋدى جەڭە المادى.
ەسكە سالايىق، AZAL ۇشاعى 2024 جىلعى 25 جەلتوقساندا باكۋدەن گروزنىيعا ۇشىپ بارا جاتىپ، اقتاۋ ماڭىندا قۇلادى. بورتتا 62 جولاۋشى جانە 5 ەكيپاج مۇشەسى بولعان، ولاردىڭ 29-ى امان قالدى. كەيىن ازەربايجان تاراپى وقيعاعا رەسەيلىك اسكەريلەردى ايىپتاپ، ولاردىڭ قاتىسى بارىن راستايتىن دالەلدەر ۇسىنعان. 2025 جىلعى قازاندا ۆلاديمير پۋتين يلحام الييەۆپەن كەزدەسۋدە رەسەيدىڭ كىناسىن مويىنداپ، AZAL ۇشاعىنىڭ اپاتىن، سونىڭ ىشىندە رەسەيلىك اۋە كەڭىستىگىندە ۋكراين دروندارىنىڭ بولۋىمەن بايلانىستىردى. سونداي-اق، ول اتىپ تۇسىرىلگەن ۇشاق ءۇشىن ازەربايجانعا وتەماقى تولەۋگە ۋادە بەردى.