اقشانى قالاي باسقارۋ كەرەك؟

قارجىلىق ساۋتتىلىق – بۇل تابىستى ارتتىرۋ، شىعىنداردى باقىلاۋ، ينۆەستيسيالاۋ جانە قارىزدان ساقتانۋ داعدىلارىنىڭ جيىنتىعى. 

    بۇگىندە اقشانى دۇرىس باسقارۋ تەك اۋقاتتى، كوپ تابىس تاباتىن ادامدار ءۇشىن عانا ەمەس، كەز كەلگەن سومادا تابىس تاۋىپ وتىرعان ادام ءۇشىن دە ماڭىزدى. قارجىلىق ساۋاتتى ادام مول تابىسقا جەتىپ، ءوزىنىڭ تۇراقتى بولاشاعىن قالىپتاستىرا الادى. اقشانى دۇرىس باسقارۋ ارقىلى تابىسىمىزدىڭ بەرەكەلى بولۋىن بايقاپ، ءاربىر قاراجات ءوز رولىندە جۇرەتىنىن بىلگەنىمىز ءجون.    قارجىلىق ساۋاتتىلىق – تۇراقتى بولاشاق كەپىلى. اقشاڭىزدى دۇرىس باسقارىپ، جوسپارلى ارەكەت ەتسەڭىز، كەز كەلگەن قارجىلىق قيىندىقتاردى ەڭسەرە الاسىز.

 ·        تاقىرىپقا وراي

نۇرجىگىت نۇربولات، قارجىگەر:

كىرىس پەن شىعىستى ەسەپكە الۋ – قارجىلىق تۇراقتىلىق نەگىزى

 قارجىلىق ساۋاتتىلىق – تابىسىمىز قانشا بولسا دا، ونى ءتيىمدى باسقارۋ قابىلەتى. اقشانى دۇرىس جۇمساۋدى ۇيرەنسەڭىز، كەز كەلگەن جاعدايدا قارجىلىق تۇراقتىلىققا قول جەتكىزۋگە بولادى.تابىس تاۋىپ وتىرعان ءاربىر ادام اقشانى ۇنەمدەۋ مەن جيناقتاۋدىڭ ءتيىمدى تاسىلدەرىن مەڭگەرۋى قاجەت. اقشانى جيناقتاۋ – قاراجاتتان باس تارتۋ ەمەس، ونى دۇرىس ءبولۋ جانە جوسپارلاۋ. بيۋدجەتتى باقىلاۋ، ياعني كىرىس پەن شىعىستى ەسەپكە الۋ – قارجىلىق تۇراقتىلىقتىڭ نەگىزگى قاعيدالارىنىڭ ءبىرى.

قارجىلىق قاتەلىكتەردەن قالاي ساقتانامىز؟ ادامدار جىبەرەتىن باستى قاتەلىك – قارجىلىق جوسپارسىز ءومىر ءسۇرۋ. تابىستى جۇيەسىز جۇمساۋ جانە ۇزاق مەرزىمدى ماقساتتاردى ەسكەرمەۋ ماتەريالدىق قيىندىقتارعا الىپ كەلەدى. مۇنداي جاعدايدان ساقتانۋ ءۇشىن قاجەتسىز نەسيە الماۋ؛ قارجىلىق قاۋىپسىزدىك قورىن قۇرۋ؛ وزىڭىزگە ينۆەستيسيا جاساۋ؛ ەموسيالىق شىعىنداردان اۋلاق بولۋ، ياعني ويلانباي جاسالاتىن ساتىپ الۋلاردى بولدىرماۋ. جانە بارلىق قاراجاتتى ءبىر جەردە ۇستاماۋ كەرەك، ولاردى  ءارتۇرلى اكتيۆتەرگە بولگەن (بانك دەپوزيتتەرى، جىلجىمايتىن مۇلىك، بيزنەس) ءجون.

   وتباسىلىق بيۋدجەتتى باسقارۋ: وتباسىلىق قارجى دۇرىس جوسپارلانباعان جاعدايدا بيۋدجەتتىك قيىندىقتار مەن كيكىلجىڭدەر ءجيى  بولادى. سوندىقتان وتباسىلىق بيۋدجەتتى ءتيىمدى باسقارۋدىڭ جولدارىن بىلگەن ابزال. ول ءۇشىن بىرنەشە ءادىس بار. بىرىنشىدەن،  بيۋدجەتتى  بىرگە جوسپارلاۋ، ياعني  بارلىق كىرىس پەن شىعىندى وتباسى مۇشەلەرىمەن بىرگە تالقىلاۋ ماڭىزدى. ەكىنشىدەن، كۇتپەگەن شىعىندارعا ارنالعان قور جاساقتاۋ، ياعني تابىستىڭ كەمىندە 10%-ىن توتەنشە جاعدايلارعا ساقتاپ قويۋ. ۇشىنشىدەن، كۇندەلىكتى شىعىنداردى وڭتايلاندىرۋ – ءومىر ساپاسىنا زيان كەلتىرمەي ۇنەمدەۋدىڭ جولدارىن تابۋ.

    قازىرگى تاڭدا ءوز كاسىبىن باستاپ، تەز بايىپ كەتەمىن دەپ ويلايتىن  كاسىپكەرلەر جەكە جانە بيزنەس قارجىسىن ارالاستىرماعانى دۇرىس، ياعني بيزنەستىڭ اقشاسىن جەكە قاجەتتىلىكتەرگە جۇمساماۋ كەرەك. ەسەپ بەرۋ مەن قارجىلىق باقىلاۋدى اۆتوماتتاندىرۋ، قانداي دا ءبىر شەشىم قابىلداۋدى جەڭىلدەتۋ جانە ءاردايىم «ب» جوسپارىن دايىنداۋ ماڭىزدى.