«ALMATY AQSHAMY» – 35 «اقشام» ارداگەرلەرى
2005 جىلى تانىمال قالامگەر قالي سارسەنباي «اقشامعا» رەداكتور بولىپ كەلگەندە گازەت رەداكسياسىندا جۋرناليستىك قىزمەتىمىزدى جالعاستىرعان ەدىك. وسىندا ءجۇرىپ «اقشامنىڭ» 20، 25 جانە 30 جىلدىق مەرەيتويىن وتكىزدىك. گازەتتىڭ 35 جىلدى- عىندا زەينەتكەرلىك جاسقا كەلسەك تە، ءاربىر ءنومىرىن ۇزبەي وقىپ وتىرامىز. ەگدەلىك جاستا اركىم-اق ءوزىنىڭ جاستىق شاعىن تامسانا ەسكە الاتىن ادەتى ەمەس پە؟ ءبىزدىڭ دە قۇلشىنىپ ەڭبەك ەتكەن، گازەتتىڭ ءاربىر ءنومىرىن تارتىمدى دا، مازمۇندى ەتىپ شىعارۋعا كۇش سالعان كەزىمىز ەسكە تۇسەدى.
الىپ شاھار – الماتىنىڭ كۇندەلىكتى تىنىسىن گازەت بەتىندە جاريالاپ وتىرۋمەن بىرگە قازاق رۋحانياتىنا قاتىستى كەسەك-كەسەك ماتەريالداردى ۇزبەي جاريالاۋعا دەن قويدىق. مىقتى-مىقتى زيالى قاۋىم وكىلدەرىنەن بەلسەندى اۆتورلار قاتارىن گازەت جۇمىسىنا تارتتىق. بەلگىلى تەاتر سىنشىسى اشىربەك سىعاي، مادەنيەتتانۋشى تالاسبەك اسەمقۇلوۆ، جازۋشى-جۋرناليست زاكىر اسابايەۆ باستاعان قارىمدى قالامگەرلەردىڭ سەريالى ماقالالارى گازەت بەتىنەن تۇراقتى ورىن الىپ كەلدى.
قازاق زيالى قاۋىمىنىڭ ىقىلاسى «اقشامعا» اۋىپ، گازەت بەتىندە كوتەرىلگەن وزەكتى ماسەلەلەرگە ۇسىنىس-پىكىرلەرىن ءبىلدىرىپ وتىردى. سونىڭ ناتيجەسىندە گازەت تيراجى ارتىپ، تۇراقتى وقىرماندار قاتارى قالىپتاستى. وتكەن جىلدار بەدەلىندە گازەتتە ۇزدىكسىز جاريالانىپ كەلگەن «سانا تازارماي، قالا تازارمايدى»، «الاش ارداقتىلارى»، «الماتى تۇرعىندارى»، «الماتى ايىمدارى»، «الماتىلىقتاردىڭ الدانىشى»، «ءوز ءسوزىم وزىمدىكى»، وزگە دە اۋقىمدى ايدارلاردى قامتىعان وزەكتى ماقالالار وقىرمان ىقىلاسىن اۋداردى. سۇيەكتى تاقىرىپ توڭىرەگىندە قاۋزاپ جازىپ، اۋقىمىن كەڭەيتىپ، كىتاپقا اينالعان «الماتىنى باسقارعاندار» سياقتى ومىرشەڭ جوبالار دا بولدى. بەلگىلى ءسوز زەرگەرى ءىسلام جارىلعاپوۆ تۋرالى جازعان ماقالا اۋقىمىن كەڭىتىپ، «ءىسلام جارىلعاپوۆتىڭ مىڭ ءبىر ءسوزى» تاقىرىبىمەن التى اي بويى گازەتتەن ورىن الىپ، وقىرمان نازارىن اۋداردى.
اكادەميك ءومىرزاق ايتبايەۆ: «بۇرىن- سوندى زەرتتەلمەي كەلگەن ءىسلامتانۋ ءىلىمىن باستاپ بەرگەن «الماتى اقشامى» گازەتى بولدى... 2008 جىلى جۇرتشىلىق قولىنا تيگەن «ءسوز زەرگەرى ءىسلام جارىلعاپوۆ» اتتى كىتاپتى ەرەكشە اتاۋعا بولادى. بۇل ءىسلامتانۋ ىلىمىنە قوسىلعان ۇلكەن ۇلەس بولدى. ەگەر عىلىم الەمىندەگى بۇرىنعى جۇيە ورنىندا بولعاندا بۇل ەڭبەكتى عىلىمي اتاق بەرەتىن عىلىمي كەڭەسكە ۇسىنۋعا بولار ەدى» دەپ جازعانى مەرەيىمىزدى كوتەرىپ تاستادى. («انا ءتىلى»، 4 قىركۇيەك، 2013 جىل).
«اقشامدا» قىزمەت اتقارعان جىلدارى كوكتەمگى ناۋرىز بەن ءتول مەرەكەمىزدەن باستاپ، بارلىق ايتۋلى كۇندەردى ۇجىم بولىپ تويلايتىنبىز. تاۋعا بارىپ، تابيعات اياسىندا وتكىزگەن كۇندەرىمىز دە اسەرلى بولاتىن. ۇجىمنىڭ ءاربىر مۇشەسىنىڭ قۋانىشى مەن رەنىشىنە ورتاقتاسىپ وتىردىق. شىعارماشىلىق كۇش-قۋاتىمىزبەن ەڭبەك ەتىپ، ىنتىماق-بىرلىگىمىزدىڭ ارقاسىندا كوڭىلدى دەمالا دا بىلدىك. وسىلايشا «اقشامدا» وتكەن جىلدارىمىز ومىردەگى ەڭ شۋاقتى شاعىمىز بولىپ ەستە قالدى.