«ALMATY AQSHAMY» – 35 «اقشام» ارداگەرلەرى
1988 جىلى «الماتى اقشامى» اشىلعاندا ەل-جۇرتتىڭ ساناسىندا ەرەكشە ءبىر سىلكىنىس پايدا بولدى. بۇل – كەڭەستىك جۇيەنىڭ كۇنى ءبىتىپ، جەلتوقسان ءوتىپ، تاۋەلسىز ەل بولامىز دەپ جەلپىنىپ جۇرگەن الاقۇيىن شاق ەدى. مەن اياقاستىنان گازەتكە رەداكتوردىڭ ورىنباسارى بوپ كەلدىم. گازەت كۇن باتا شىعادى. «ۆەچەركا»-عا كوزدەرى ۇيرەنگەن جۇرتتىڭ، اسىرەسە، زيالى قاۋىمنىڭ جۇرەگى «الماتى اقشامى» دەپ سوعا باستادى، جۇرە كەلە «اقشام» دەيتىن بولدى. تاۋەلسىزدىك تابالدىرىعىنان ءتاي-تاي باسقان قازاقى كوڭىلدەر ءوز تۇتىنىندە شالقىپ وتىرىپ قاناعات سەزىممەن «اقشامدى» وقىدى، دۇڭگىرشەكتەن تاپپاسا، رەداكسياعا كەپ الىپ كەتىپ ءجۇردى.
جۋرناليستەر دە سايدىڭ تاسىنداي ەدى. قانات قايىموۆ، راۋشان يماشيەۆا، ت.ب. قىز- جىگىتتەر ءارتۇرلى تاقىرىپتاردى قوزعاپ، تىڭعا تۇرەن سالا باستادى.
ءوزىم وسى «اقشامدا» جۇرگەندە «كوزبوياۋى جوق كورىنىستەر» سيكلىن باستادىم. جۇرتشىلىق جىلى قابىلدادى. كىتاپ كەيىنگە قالىپ، قالتا تەلەفون قىلتيىپ قولعا ىلىگىپ، ەل-جۇرت ينتەرنەتكە يىلە باستاعان شاقتا ءومىر كورىنىستەرىن ءبىرسىدىرعى قابىلداۋ دا وزگەرىسكە ۇشىرادى. وسى ساتتەگى كوڭىل كۇيدى تاپ باسىپ، ءومىردىڭ كۇنگەيى مەن كولەڭكەسىنە ءبىر ءسات باعا بەرۋ مىندەت بولدى. قايتا قۇرۋ مەن تاۋەلسىزدىك اراسىنداعى وسىنداي ەكىۇداي سەزىم ءبىزدىڭ سانامىزعا دا الاي-دۇلەي وزگەرىستەر اكەلدى، «قاشانعى تالتايىپ تۇرامىز؟» دەگەن اۋلەكى ءسوزدىڭ شىققان كەزى دە وسى شاق.
ءتىپتى، ايتىس اقىندارىنىڭ «قايتا قۇرۋ دەگەنىم – قايتا قۇرۋ، اتىمدى قايتا ەرتتەپ، قايتا ءمىنۋ» دەپ توپەپ، ۋاقىتتىڭ قوسىن جەككەنى دە كوز الدىمىزدا. ءبىراق قايتا ەرتتەلگەن ات پەن اتىرىلىپ العا شىققان سايگۇلىكتى كورە قويمادىق، حالىق جالاڭ ءسوز بەن جاداعاي ۇراننىڭ تاساسىندا قالا بەردى. وسىنداي كوڭىل كۇي «كوزبوياۋى جوق كورىنىستەر»ء-دىڭ ارقاۋى بولدى. ب ۇ ل جازبالاردى تەك «اقشامعا» عانا جاريالاپ ءجۇردىم.
«اقشامدا» ۇزاق ىستەگەنىم جوق، ءبىراق مازداعان وتتىڭ تۇتانىپ، ۇشقىننىڭ جالىنعا اينالۋىنا كۋا بولدىم. گازەتتىڭ العاشقى ساندارىن ساقتاپ قويدىم. مىنە، سودان بەرى دە جىلجىپ 35 جىل وتە شىعىپتى. «اقشام» ءقازىر تەك قالالىق ەمەس، رەسپۋبليكاعا ايگىلى باسىلىم، «اقشامنىڭ» اۋقىمى كەڭ. قانشاما قالام يەلەرى وسى شاڭىراقتان قانات قاقتى. استانا سولتۇستىككە اۋىسقانمەن، «الماتى اقشامى» وڭتۇستىك استانانىڭ كوزى بوپ قالا بەردى. بۇل دا «قازاق» گازەتى سياقتى قازاقپەن بىرگە جاساپ، قۋانىشى مەن مۇڭىن بىرگە بولىسكەن ايگىلى باسىلىمعا اينالدى دەر ەدىم. 35 جىل كوز ۇشىندا قول بۇلعاپ كەتىپ بارادى.