ءۇش دۇركىن الەم چەمپيونى نازىم قىزايباي جەكە بوكس زالىن اشۋ جوسپارى ءۇشىن وليمپيادادان كەيىن سىيعا العان كولىگىن ساتاتىنىن ايتتى، دەپ حابارلايدى AqshamNews.kz ءتىلشىسى.
بوكسشىنىڭ جازۋىنشا، 2025 جىلعا ءۇش ۇلكەن ماقسات قويعان: الەم چەمپيوناتىن ءۇشىنشى رەت جەڭۋ، اتا-اناسىنا كەڭ ءۇي الىپ بەرۋ جانە ءوز زالىنىڭ ەسىگىن اشۋ. ونىڭ ايتۋىنشا، بۇل جوسپارلاردىڭ ەكەۋى ورىندالعان.
«ءۇش دۇركىن الەم چەمپيونى بولدىم. بيىل ەكى الەم چەمپيوناتى وتكەندىكتەن، رەكوردىمدى جاڭارتقىم كەلگەن ەدى، ءبىراق ەكىنشىسىندە كۇمىس مەدال الدىم. وسىلايشا الەم چەمپيوناتىنداعى جۇلدەلەرىم تولىق كومپلەكت بولدى. وتباسىما ۇلكەن ءۇي الدىم، ءبارى قۋانىپ وتىر»، – دەپ ءبولىستى سپورتشى.
نازىم قىزايباي جىل سوڭىنا دەيىن ءۇشىنشى ارمانىن دا جۇزەگە اسىرماق. ول وزىنە ۇناعان شاعىن عيماراتتى قاراپ قويعانىن ايتىپ، سوعان قاراجات جيناۋ ءۇشىن كولىگىن ساتۋعا شەشىم قابىلداعانىن جەتكىزدى.
«ءقازىر شاعىن عيماراتتى قاراستىرىپ قويدىم، كوڭىلىمنەن شىقتى. سوندىقتان ءبىر حابارلاندىرۋ جاسايىن دەدىم: ءوزىمنىڭ كولىگىمدى ساتامىن. بۇل كولىك ماعان وليمپيادادان كەيىن سىيعا بەرىلگەن. ءبىر جىلدان اسا ۋاقىت ءمىندىم، جاعدايى جاقسى»، – دەپ تۇيىندەدى ول.