اقشا ايىرباستاۋ پۋنكتىنىڭ «يەسى» الاياق بولىپ شىقتى

الاياق اقشا ايىرباستاۋعا كەلگەن قىزدىڭ 80 مىڭ دوللارىن قولدى ەتكەن

قىلمىس الماتىنىڭ مەدەۋ اۋدانىندا بولدى. الاياق ءوزىنىڭ جىمىسقى پيعىلىن سەمەيدە جۇرگەن جەرىنەن ويلاستىرىپ كەلگەن، دەپ حابارلايدى Almaty-akshamy.kz.

الماتى پوليسيا دەپارتامەنتىنىڭ مالىمەتىنشە، ەر ادام الماتىعا كەلدى، اقشا ايىرباستاۋ ورنى ءۇشىن كەڭسە جالداپ، ءتىپتى ۆاليۋتا ايىرباستاۋ تۋرالى حابارلاندىرۋدى دا ءىلىپ قويعان.  ۆاليۋتا ايىرباستاۋدىڭ قولايلى شارتتارى تۋرالى قۋلىققا ءبىرىنشى بولىپ الماتى تۇرعىنى تۇسكەن.  

«جەكسەنبى كۇنى، كەزدەسۋ ۋاقىتىنا كەلىسىپ، قىز 80 مىڭ دوللاردى قۇرايتىن بارلىق سومانى بەلگىلەنگەن جەردە جانە ۋاقىتتا كۇدىكتىگە اكەلىپ بەردى.  ەر ادام ايىرباستايمىن دەگەن سىلتاۋمەن باسقا بولمەگە كىرىپ،  قوسالقى ەسىك ارقىلى شىعىپ، جاسىرىنىپ قالدى.  بەلگىلى ءبىر ۋاقىت كۇتكەن بويجەتكەن ءوزىنىڭ الدانىپ قالعانىن ءتۇسىنىپ، پوليسيادان كومەك سۇرادى»، - دەيدى، مەدەۋ اۋداندىق پوليسيا باسقارماسى باستىعىنىڭ ورىنباسارى، پوليسيا پودپولكوۆنيگى جانىبەك شىناسىلوۆ.

كۇدىكتى - 1985 جىلى تۋعان ش.ەسىمدى ازامات. ول وسكەمەن قالاسىنىڭ اۋەجايىندا ۇستالدى.  ءدال سول جەردە ول ۇرلانعان اقشامەن جاسىرىنباق بولعان.

اتالعان دەرەك بويىنشا قىلمىستىق ءىس قوزعالدى.  كۇدىكتى قاماۋدا وتىر.