ەل اۋماعىندا 1450 ادام سەنىم تەلەفونىنا حابارلاسىپ، ءتۇرلى كومەك سۇراعان
بيىل تۇرمىستىق زورلىق-زومبىلىققا ۇشىراعانداردىڭ سانى 2 ەسە وسكەن. ەل اۋماعىندا 1450 ادام سەنىم تەلەفونىنا حابارلاسىپ، ءتۇرلى كومەك سۇراعان، دەپ حابارلايدى Almaty-akshamy.kz Almaty.tv-گە سىلتەمە جاساپ.
ايبارا عازيز 4 جىل بۇرىن تۇرمىستىق زورلىق-زومبىلىققا ۇشىراعان. تاعدىردىڭ قيىندىعىنا مويىماعان كەيىپكەر – 5 بالانىڭ اناسى. ول پسيحولوگيالىق قيىندىققا قاراماستان، بۇگىندە ءوز كاسىبىن دوڭگەلەتىپ وتىر.
«پسيحولوگپەن جۇمىس جاساعاننان كەيىن، مەنىڭ وزىمدە دە نامىس ويانا باستادى. «مەن بۇل جەردە جاتۋعا مىندەتتى ەمەسپىن، تىرشىلىك ىستەۋىم كەرەك» دەپ 40 مىڭ تەڭگەگە كىشىگىرىم ماشينكامدى الىپ سول جەردە جاستىق، كورپە تىگىپ، اقشا جينادىم. قازىرگى تاڭدا مەندە ەكى كومپانيا بار، ونى ماقتانىشپەن ايتامىن. اسىرەسە، كوپبالالى انالارمەن جۇمىس جاسايمىز»، – دەدى كاسىپكەر ايبارا عازيز.
ايبارانىڭ اياقتان تىك تۇرۋىنا داعدارىس ورتالىعى تىكەلەي سەپ بولعان. 8 باعىتتا كومەك كورسەتىپ، الەۋمەتتىك قولداۋ جاسايتىن مەكەمەنىڭ اشىلعانىنا بيىل 5 جىل تولىپ وتىر. مەرەيلى كۇندە باس قوسقان ماماندار ءوز قىزمەتتەرىن قوعامنىڭ جاقسارۋىنا ۇلەس قوساتىنى ءۇشىن جاقسى كورەدى، قۇلشىنىپ ىستەيدى. سوڭعى 5 جىلدا ولاردىڭ كومەگىنە 4000-نان استام ادام جۇگىنىپتى. ولاردىڭ ءبارى – وتباسىلىق تۇسىنىسپەۋشىلىكتىڭ قۇرباندارى.
ايەلدەردىڭ تاعدىرى ءارتۇرلى. ءبىراق ءبارىن ءبىر نارسە بىرىكتىرەدى. ول – زورلىق-زومبىلىققا قارسى ەرىك-جىگەر، تاعدىر سالعان تەزگە كونبەۋ، تۋرا جول تابا الۋ. ال بۇل جولدا ولارعا جانعا سايا بولعان ورتالىق كومەكتەسكەن.
مەرەكەلىك ءىس-شاراعا ءبىر كەزدەرى ورتالىقتى پانا تۇتقان انالار دا قاتىستى. كوپشىلىك ءۇشىن قولونەر بۇيىمدارى كورمەگە قويىلدى. كەلگەندەردى كەرى قايتارماي، كەرىسىنشە قول ۇشىن سوزاتىن مەكەمەنىڭ ءوزى كەمى 50 ادامعا ارنالعان. ءبىراق ماماندار اي-اپتالاپ، كەيدە كۇن سايىن جاڭا وقيعانىڭ كۋاسى بولامىز دەيدى.
«ستاندارتقا سايكەس، كەلىپ تۇسكەن ايەلدەر بىزدە 6 اي ارالىعىندا تۇرۋعا مۇمكىندىگى بار. ءبىراق ءار كەلگەن ايەلدىڭ ءوزىنىڭ جەكە جاعدايىنا بايلانىستى مەرزىمدى بەكىتەمىز»، – دەدى الەۋمەتتىك قىزمەتكەر ءزۇلفيا وماروۆا.
2017 جىلدان باستاپ «جان-سايا» داعدارىس ورتالىعىن 867 بالا مەن 474 ايەل پانا ەتكەن. ال جالپى سەنىم تەلەفونىنا حابارلاسىپ، قول ۇشىن سوزۋدى سۇراعانداردىڭ سانى كوپ. سوڭعى 5 جىلدا مۇنداي 1341 ادام باسپاناعا ورنالاسىپ، 719-ى زاڭگەرلىك كەڭەس السا، پسيحولوگتىڭ كومەگىنە جۇگىنگەن 2082 جاعداي تىركەلىپ وتىر.