اقش-تا ەل ازاماتتارى كەلەسى پرەزيدەنتىن تاڭدايتىن سايلاۋ باستالدى.
بۇكىل الەم بۇل ۇدەرىستى مۇقيات باقىلاپ وتىر، ويتكەنى سايلاۋ قورىتىندىلارى حالىقارالىق ارەناداعى كۇشتى ورنالاستىرۋدى وزگەرتۋى مۇمكىن، دەپ حابارلايدى aqshamnews.kz.
ەل بويىنشا سايلاۋ ۋچاسكەلەرى 5 قاراشادا ءارتۇرلى ۋاقىتتا اشىلادى.
ۆەرمونت داۋىس بەرۋدى جەرگىلىكتى ۋاقىت بويىنشا تاڭعى ساعات 5-تە باستايتىن العاشقى شتات بولادى جانە ول 19:00-گە دەيىن جالعاسادى. ودان كەيىن تاڭعى ساعات 6:00-دە كوننەكتيكۋت، كەنتۋككي، مەن، نيۋ-دجەرسي، نيۋ-يورك جانە ۆيردجينيا شتاتتارىندا سايلاۋ ۋچاسكەلەرى اشىلادى. سولتۇستىك كارولينا، وگايو جانە باتىس ۆيردجينيا شتاتتارىندا سايلاۋ پروسەسى تاڭعى 6:30-دا باستالادى. 37 شتاتتا جانە كولۋمبيا وكرۋگىندە سايلاۋ تاڭعى 7:00 مەن 10:00 ارالىعىندا باستالادى. ۆاشينگتون شتاتى مەن الياسكا تۇرعىندارى ساعات 11:00-دەن، گاۆاي حالقى ساعات 12:00-دەن داۋىس بەرە باستايدى.
امەريكالىق سايلاۋشىلار پرەزيدەنتتىككە التى ۇمىتكەردىڭ بىرىنە داۋىس بەرەدى. ولار كامالا حارريس (ۆيسە-پرەزيدەنت، دەموكراتيالىق پارتيا)، دونالد ترامپ (بۇرىنعى پرەزيدەنت، رەسپۋبليكالىق پارتيا)، كورنەل ۋەست (فيلوسوفيا پروفەسسورى، جازۋشى، ءدىن مامانى، حريستيان ءسوسياليستى، تاۋەلسىز كانديدات)، دجيلل ستاين (دارىگەر، جاسىلدار پارتياسى)، چەيز وليۆەر (بەلسەندى، ليبەرتارياندىق پارتيا) جانە كلاۋديا دە لا كرۋز (قوعامدىق بەلسەندى، شىركەۋ پاستورى، سوسياليزم جانە ازاتتىق پارتياسى).
اقش-تىڭ بارلىق ازاماتتارى داۋىس بەرۋ ءۇشىن وسى جىلدىڭ 15 قازانىنا دەيىن تىركەلۋى ءتيىس بولعان. داۋىس بەرۋگە تىركەلۋ ءۇشىن اقش ازاماتى جانە داۋىس بەرەتىن شتاتتىڭ تۇراقتى تۇرعىنى بولۋى ءتيىس. سايلاۋشى كەم دەگەندە 18 جاستا، اقىل-ويى ساۋ جانە باسقا شتاتتا داۋىس بەرۋ ءۇشىن تىركەلمەگەن بولۋى شارت.
داۋىس بەرۋ بيۋللەتەندەرى اعىمداعى جىلدىڭ 16 قازانىنان باستاپ 22 قازانعا دەيىن پوشتا ارقىلى جىبەرىلدى جانە 5 قاراشادا ساعات 20.00-دەن كەشىكتىرىلمەي جارامدى پوشتا شتەمپەلى جاپسىرىلىپ پوشتا ارقىلى قايتارىلۋى نەمەسە سايلاۋ كۇنى داۋىس بەرۋ جاشىگىنە تاستالۋى ءتيىس.
ەلدە داۋىس بەرۋ بارىسىن جۇزدەگەن حالىقارالىق باقىلاۋشى قاداعالاپ وتىر.