فرانسيا پرەزيدەنتى ەممانۋەل ماكروننىڭ قازاق تازىلارىمەن تۇسكەن بەينەروليگى الەۋمەتتىك جەلىلەردە كەڭ تارالدى، دەپ حابارلايدى aqshamnews.kz
بۇل بەينەروليكتە ماكرون قازاقى تازى كۇشىكتەرىمەن جىلى جۇزبەن اڭگىمەلەسىپ، ولاردى ەركەلەتىپ وتىرعانى كورىنەدى. بۇعان دەيىن، قازاقستان پرەزيدەنتى قاسىم-جومارت توقايەۆ فرانسيا باسشىسىنا قازاقتىڭ ءداستۇرلى اڭشىلىق يتتەرىنىڭ بىرەگەي تۇقىمى سانالاتىن ەكى تازى كۇشىگىن سىيعا تارتقان بولاتىن.
تازىلارعا جيۋل جانە جاننا دەگەن جاراسىمدى فرانسۋزدىق ەسىمدەر بەرىلدى. بۇل تاڭداۋداعى سيمۆوليزم دە ەرەكشە: فرانسۋز جازۋشىسى جيۋل ۆەرن مەن تاريحي تۇلعا جاننا د’اركتىڭ قۇرمەتىنە قويىلعانداي. وسىلايشا، تازى كۇشىكتەرى ەكى ەل اراسىنداعى دوستىقتىڭ بەلگىسىنە اينالدى. ماكروننىڭ ءوزى دە بۇل سىيلىققا ريزاشىلىق ءبىلدىرىپ، قازاق حالقىنىڭ ۇلتتىق قۇندىلىقتارىن قادىرلەيتىنىن اتاپ وتكەن ەدى.
سىزدەردى جاننا جانە جيۋلمەن تانىستىرامىن – ءبىر جىل بۇرىن قازاقستانعا مەملەكەتتىك ساپارىم بارىسىندا پرەزيدەنت توقايەۆ سىيلاعان ەكى تازى. نەمومەن بىرگە تاماشا ۇشتىك!، دەپ جازدى ەممانۋەل ماكرون ءوزىنىڭ Instagram پاراقشاسىندا.
تازىلار – قازاقستاننىڭ مادەني مۇراسى مەن اڭشىلىق ءداستۇرىنىڭ اجىراماس بولىگى بولىپ تابىلادى. ەجەلدەن بەرى قازاقتار بۇل يتتەردى ادالدىعى مەن اڭشىلىق شەبەرلىگى ءۇشىن جوعارى باعالاعان. تازىلاردىڭ فرانسيا پرەزيدەنتىنىڭ ۇيىندە جاڭا ورتاعا ۇيرەنىپ، شىنايى دوستىقتىڭ سيمۆولىنا اينالعانى قازاقستان مەن فرانسيا اراسىنداعى بايلانىستاردىڭ مادەني كوپىرى بولىپ تۇر.