اقش-تا مايمىل شەشەگىن جۇقتىرعانداردىڭ كوبەيۋىنە بايلانىستى بايدەن اكىمشىلىگى بۇكىل ەلگە ۆاكسينا تاراتۋدى باستايدى، دەپ حابارلايدى Almaty-akshamy.kz Inform.kz-كە سىلتەمە جاساپ.
اقش دەنساۋلىق ساقتاۋ جانە الەۋمەتتىك قىزمەت كورسەتۋ مينيسترلىگى «Jynneos» ۆاكسيناسىنىڭ 56 مىڭ دوزاسىن ۆيرۋس جۇقتىرۋ جىلدامدىعى جوعارى ايماقتارعا جىبەردى. بىرنەشە اپتا ىشىندە تاعى 240 مىڭ ۆاكسينا تاراتىلماق. كۇز سوڭىنا دەيىن كەم دەگەندە 1،6 ملن دوزا قولجەتىمدى بولادى دەپ كۇتىلىپ وتىر. اقش-تىڭ اۋرۋلاردى باقىلاۋ جانە الدىن الۋ ورتالىقتارىنىڭ سوڭعى مالىمەتتەرىنە سايكەس، ينفەكسيا جۇقتىرۋ سانى ەڭ كوپ ايماقتارعا كاليفورنيا، نيۋ-يورك، يللينويس، فلوريدا جانە ۆاشينگتون قالالارى كىرەدى.
اقش-تا مايمىل شەشەگى العاش رەت مامىر ايىندا ماسساچۋسەتس شتاتىندا انىقتالدى. سودان بەرى ۆيرۋس بۇكىل ەلگە تاراپ، 28 شتاتتا 306-دان استام جۇقتىرۋ جاعدايى تىركەلدى. ازىق-تۇلىك جانە دارى-دارمەكتەردى باقىلاۋ باسقارماسى ماقۇلداعان ەكى دوزالى «Jynneos» ۆاكسيناسى ينفەكسيانىڭ الدىن الىپ قانا قويماي، جۇقتىرعان ينفەكسيانى توقتاتادى. دوزا 28 كۇن ارالىقپەن سالىنادى. اقش-تىڭ اۋرۋلاردى باقىلاۋ جانە الدىن الۋ ورتالىعى 49 ەلدە كەم دەگەندە 4 700 ادامنىڭ مايمىل شەشەگىن جۇقتىرعانى انىقتالعانىن حابارلادى.