كوپتەگەن الەۋەتتى كليەنتتەر ءۇي ساتىپ الۋدان باس تارتتى.
يپوتەكا مولشەرلەمەسى 2008 جىلدان بەرى العاش رەت 6 پايىزعا جەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
يپوتەكا مولشەرلەمەسى وتكەن اپتادا 5،89%-دان 6،02%-عا كوتەرىلدى. بۇل – وتكەن جىلمەن سالىستىرعاندا ەكى ەسەدەن استام جوعارى – 2،86% ءوسىپ، 2008 جىلدىڭ قاراشاسىندا تۇرعىن ءۇي نارىعىنىڭ قۇلدىراۋى ۇلى رەسەسسيانى تۋدىرعاننان كەيىن تىركەلگەن ەڭ جوعارى كورسەتكىش.
فەدەرالدى رەزەرۆتىك جۇيەنىڭ ينفلياسيانى تەجەۋگە باعىتتالعان اگرەسسيۆتى شارالارىنىڭ ناتيجەسىندە پايىزدىق مولشەرلەمەلەردىڭ كوتەرىلۋى تۇرعىن ءۇي نارىعىن تەجەدى. كوپتەگەن الەۋەتتى كليەنتتەر ءۇي ساتىپ الۋدان باس تارتتى، ويتكەنى جوعارى مولشەرلەمەلەر اي سايىنعى يپوتەكالىق تولەمدەردى جۇزدەگەن دوللارعا كوبەيتكەن. ۇلتتىق ريەلتورلار قاۋىمداستىعىنىڭ مالىمەتىنشە، اقش-تاعى ۇيلەردىڭ ساتىلىم كورسەتكىشى قاتارىنان التى اي بويى تومەندەپ كەلەدى.
ۇيلەرىن قايتا قارجىلاندىرعىسى كەلەتىندەر اراسىندا سۇرانىسقا يە 15 جىلعا بەلگىلەنگەن يپوتەكا بويىنشا ورتاشا مولشەرلەمە وتكەن اپتادا 5،16%-دان 5،21%-عا دەيىن ءوستى. وتكەن جىلى بۇل كورسەتكىش 2،19 پايىز بولدى.
ۇكىمەت اقش-تىڭ ەكونوميكالىق كورسەتكىشتەرى ءساۋىر-ماۋسىم ارالىعىندا جىلىنا 0،6%-عا تومەندەگەنىن، بۇل – ەكونوميكانىڭ ەكىنشى توقسان قاتارىنان قۇلدىراۋى جانە رەسەسسيانىڭ بەيرەسمي بەلگىسى ەكەنىن مالىمدەدى.
دەگەنمەن، ەكونوميستەردىڭ كوپشىلىگى اقش-تا ەڭبەك نارىعىنىڭ تۇراقتى بولىپ قالۋىن ەسكەرە وتىرىپ، ەكونوميكانىڭ رەسەسسيادا نەمەسە رەسەسسيا الدىندا تۇرعانىنا كۇمانداناتىنىن ايتتى.