الماتىلىق دارىگەرلەر كۇيىك شالعان ادامدى ولىمنەن امان الىپ قالدى

ناۋقاسقا الماتى قالالىق №4 كلينيكالىق اۋرۋحاناسىندا وتا جاسالعان.

الماتىلىق دارىگەرلەر دەنەسىنىڭ 80 پايىزىن كۇيىك شالعان ەر ادامدى ولىمنەن امان الىپ قالدى، دەپ حابارلايدى Almaty-akshamy.kz.

اۋرۋحاناعا اۋىر حالدە جەتكىزىلگەن ناۋقاس وسىدان 3 اي بۇرىن اۋلاداعى قۇدىقتى جوندەۋ كەزىندە كيىمىنە شوق ءتۇسىپ، تىرىدەي ورتەنىپ كەتە جازداپتى.

ءولىم اۋزىندا جاتقان ناۋقاسقا الماتى قالالىق №4 كلينيكالىق اۋرۋحاناسىندا وتا جاسالعان. 29 جاستاعى نۇرسۇلتان ءسادۋاقاسوۆتى امان الىپ قالۋ ءۇشىن وپەراسياعا رەانيماتولوگ، كومبۋستيولوگ، كارديولوگ جانە باسقا دا بىلىكتى دارىگەرلەر قاتىسىپتى. ەر ادامنىڭ وڭالۋىنا 80 كۇندەي ۋاقىت كەتكەن.

«26 ماۋسىمدا اياق استى ۇيدە جوندەۋ جۇمىستارىن جاساپ جاتىپ، ءورت تۇتانىپ،كيىم ورتەنىپ كەتتى. دەنەمدى كۇيىك شالدى»، – دەدى ناۋقاس نۇرسۇلتان ءسادۋاقاسوۆ.

وقىس وقيعا 26 ماۋسىم كۇنى الماتى وبلىسىنداعى ۇزىناعاش اۋىلىندا بولعان ەكەن. ويدا-جوقتا ازامات اۋرۋحانانىڭ جان ساقتاۋ بولىمىنەن ءبىراق شىققان. ال دارىگەرلەردىڭ سوزىنە سەنسەك، مۇنداي جاراقات سالدارىنان ادامنىڭ ءتىرى قالۋى ەكىتالاي.

«ناۋقاس اۋرۋحاناعا اۋىر حالدە ءتۇستى. دەنەسىنىڭ 80 پايىز كۇيىك شالعان. وعان جانساقتاۋ بولىمىندە وتا جاسالدى. كەيىن كۇيگەن جەرلەرىنە جاساندى تەرى قاپتادىق»،– دەدى №4 قالالىق كلينيكالىق اۋرۋحاناسىنىڭ ءبولىم مەڭگەرۋشىسى نۇرجان بيقوڭىروۆ.

تەرى ترانسلپانتاسياسىنان كەيىن جارانىڭ بەتى بىرتىندەپ جازىلىپ كەتۋى ءتيىس. دارىگەرلەر نۇرسۇلتاننىڭ جاعدايى ەداۋىر تۇزەلگەنىن، ستاسيونارلىق ەمگە ءزارۋ ەمەس ەكەنىن ايتتى. سوندىقتان ول ۇيىنە قايتىپ، وتباسىمەن قاۋىشاتىن ءساتتى تاعاتسىزدانا كۇتىپ وتىر.