قازاقستان رەسپۋبليكاسىنىڭ ساۋدا جانە ينتەگراسيا مينيسترلىگى اقش-تىڭ قىتايدان كەلەتىن تاۋارلارعا سالاتىن سالىقتارىن ارتتىرۋى ەلىمىزدىڭ ەكونوميكاسىنا تەرىس اسەر ەتپەيدى دەپ كۇتىپ وتىر، ءارى جۇڭگو تاۋارلارىنىڭ كوپتەپ كىرۋى جايلى الاڭداۋشىلىق جوق، دەپ حابارلايدى aqshamnews.kz
"جۇڭگو ءتۇرلى تاۋارلاردىڭ ۇلكەن كولەمىن وندىرەدى. اقش-تاعى جۇڭگو تاۋارلارىنا دەگەن سۇرانىس قازاقستانداعى سۇرانىستان ەرەكشەلەنەدى. ياعني، تۇتىنۋشىلىق سۇرانىس پەن نارىقتىڭ تالعامى ءارتۇرلى. سوندىقتان تاۋارلاردىڭ كوپتەپ كىرۋى كۇتىلمەيدى. قازاقستانعا ىقپال ەتۋ تەك ترانزيتتىك اعىنداردا بولۋى مۇمكىن، سەبەبى جۇڭگو ەۋروپاعا ەكسپورتىن ارتتىرىپ، اقش-پەن تىكەلەي ساۋدا كەدەرگىلەرىنەن اۋلاق بولۋعا تىرىسادى"، – دەدى ساۋدا جانە ينتەگراسيا ۆيسە-مينيسترى قايرات تورەبايەۆ.
دەگەنمەن، ەكونوميستەر بۇل ماسەلەگە وڭ كوزقاراسپەن قارامايدى. ەكونوميست عالىمجان ءايتقازيننىڭ پىكىرىنشە، جۇڭگو تاۋارلارىنىڭ قىمباتتاۋى الەمدىك دەڭگەيدە ينفلياسيالىق قىسىمدى كۇشەيتۋى مۇمكىن جانە بۇل قازاقستان ەكونوميكاسىنا دا كەرى اسەرىن تيگىزۋى مۇمكىن.
"مەنىڭ ويىمشا، اقش-تىڭ قىتايعا 20% سالىق ەنگىزۋى جۇڭگو ەكونوميكاسىنىڭ باسەڭدەۋىنە اكەلىپ، بۇل ءوز كەزەگىندە مۇناي، مەتالدار جانە ۋرانعا دەگەن سۇرانىستى تومەندەتۋى مۇمكىن. ال قازاقستاننىڭ شيكىزات ەكسپورتىنا جوعارى تاۋەلدىلىگى ەلىمىزدىڭ ەكسپورتتىق كىرىستەرىنىڭ تومەندەۋىنە اسەر ەتەدى. سونىمەن قاتار، شيكىزات باعاسىنىڭ وزگەرۋى ۆاليۋتالىق كۋرستىڭ قۇبىلۋىنا الىپ كەلۋى مۇمكىن"، – دەپ اتاپ ءوتتى ول.