امەريكا قۇراما شتاتتارى قازاقستاننىڭ بۇكىل الەمدە يادرولىق سىناقتاردى توقتاتۋدى قولداۋ جونىندەگى تاباندى ۇستانىمى ۇلكەن قۇرمەتكە لايىق دەپ باعالايدى.
اقش-تىڭ مەملەكەتتىك دەپارتامەنتى سەمەي يادرولىق پوليگونىنىڭ جابىلعانىنا 30 جىل تولۋىنا وراي مالىمدەمە جاسادى، دەپ حابارلايدى Almaty-akshamy.kz.
بۇل تۋرالى قازاقستان پرەزيدەنتىنىڭ باسپا ءسوز حاتشىسى بەرىك ءۋالي ءوزىنىڭ facebook پاراقشاسىندا جاريالادى.
اقش مەملەكەتتىك دەپارتامەنتى مالىمدەمەسىندە قازاقستاندى سەمەي يادرولىق سىناق پوليگونىنىڭ جابىلۋىنىڭ 30 جىلدىعىمەن قۇتتىقتادى.
«امەريكا قۇراما شتاتتارى قازاقستاندى سەمەي يادرولىق سىناق پوليگونىنىڭ جابىلۋىنىڭ 30 جىلدىعىمەن قۇتتىقتايدى. پوليگوندى جابۋ تۋرالى شەشىم يادرولىق قاۋىپسىزدىك پەن ونى تاراتپاۋدى تولىق قولدايتىنىن كورسەتەدى. قازاقستاننىڭ سەمەي پوليگونىن جابۋ تۋرالى شەشىمى الەمدە بەيبىتشىلىككە قول جەتكىزۋگە باعىتتالعان اسا ماڭىزدى شارالاردىڭ ءبىرى ءارى بىرەگەيى بولدى. پوليگون جابىلعاننان بەرى قۇراما شتاتتار قازاقستانمەن بىرلەسىپ كەڭەستىك يادرولىق سىناقتاردان قالعان ينفراقۇرىلىمداردىڭ قالدىقتارىن جويۋ بويىنشا ارىپتەستىك ورناتتى. جۋىردا دەگەلەڭ تاۋىنداعى يادرولىق سىناقتار جۇرگىزىلگەن 181 جەر استى وتكەلى جويىلدى، - دەلىنگەن ماتىندە.
سونىمەن بىرگە اقش مەملەكەتتىك دەپارتامەنتى قازاقستاننىڭ بۇكىل الەمدە يادرولىق سىناقتاردى توقتاتۋدى قولداۋ جونىندەگى تاباندى ۇستانىمى ۇلكەن قۇرمەتكە لايىق دەپ باعالادى.
«قازاقستاننىڭ بۇكىل الەمدە يادرولىق سىناقتاردى توقتاتۋدى قولداۋ جونىندەگى تاباندى ۇستانىمى ۇلكەن قۇرمەتكە لايىق. بۇل رەتتە امەريكا قۇراما شتاتتارى يادرولىق سىناقتارعا جاپپاي تىيىم سالۋ تۋرالى كەلىسىمدى قولدايدى جانە وسى ماقساتقا جەتۋ جولىندا كەزدەسەتىن سىن-قاتەرلەردى ەسكەرە وتىرىپ، ونىڭ ىسكە اسۋىنا كۇش سالادى.
يادرولىق سىناقتارعا جاپپاي تىيىم سالۋ تۋرالى كەلىسىمنىڭ ماقساتتارىنا سايكەس قۇراما شتاتتار يادرولىق سىناقتارعا ءموراتورييدىڭ ساقتالۋىن جانە يادرولىق قارۋى بار بارلىق مەملەكەتتەردى موراتوريي جاريالاۋعا نەمەسە جالعاستىرۋعا ۇندەيدى. ءبىز قازاقستان ۇكىمەتىنە تۇراقتى سەرىكتەستىگى ءۇشىن ريزاشىلىعىمىزدى بىلدىرەمىز»، - دەيدى اقش مەملەكەتتىك دەپارتامەنتى.