بارلىق مەكتەپتەر قورعانىس قۇرالدارىمەن قامتاماسىز ەتىلدى.
وبلىس پەداگوگتارىنىڭ 99%-ى ۆاكسينا سالدىردى. ءبىلىم بەرۋ ۇيىمدارى كۇردەلى ەپيدەميولوگيالىق جاعدايدا ءداستۇرلى فورماتتا وقىتۋعا تولىق دايىن، دەپ حابارلايدى Almaty-akshamy.kz.
بۇل تۋرالى «Jetisy Media» الاڭىندا وتكەن ءباسپاسوز-ماسليحاتىندا الماتى وبلىسى اكىمىنىڭ ورىنباسارى باتىرجان بايجۇمانوۆ مالىمدەدى.
بەلگىلى بولعانداي، بولجام بويىنشا جاڭا وقۋ جىلىندا وقۋشىلار سانى 440 مىڭعا وسەدى، ءبىرىنشى سىنىپقا 47 مىڭ وقۋشى قابىلدانادى.
«بارلىق مەكتەپتەر قورعانىس قۇرالدارىمەن قامتاماسىز ەتىلدى، بۇل ماقساتقا جەرگىلىكتى بيۋدجەتتەن 200 ملن.تەڭگە ءبولىندى. بارشا ءبىلىم بەرۋ نىساندارىندا «اشىق» باعدارلاماسى ەنگىزىلدى»، - دەپ اتاپ ءوتتى باتىرجان بايجۇمانوۆ.
جاڭا وقۋ جىلىندا وبلىس مەكتەپتەرىندە حالىقتىڭ الەۋمەتتىك وسال توپتارىنان جانە از قامتىلعان وتباسىلاردان شىققان وقۋشىلاردىڭ 100%-ى تەگىن ىستىق تاماقپەن قامتاماسىز ەتىلەدى.
«كوپ بالالى جانە از قامتىلعان وتباسىلاردان شىققان 44 531 وقۋشىنى ىستىق تاماقپەن، مەكتەپ فورماسىمەن قامتاماسىز ەتۋگە قوسىمشا 2،6 ملرد.تەڭگە ءبولىندى»، - دەپ ايتتى وبلىستىق ءبىلىم بەرۋ باسقارماسى باسشىسىنىڭ م. ا. جاڭىل سۇلەيمەنوۆا.
ايتا كەتەيىك، «مەكتەپكە جول» اكسياسى اياسىندا 12 902 وقۋشىعا 122 ملن. تەڭگە كولەمىندە دەمەۋشىلىك كومەك كورسەتىلدى. بۇل باعىتتاعى جۇمىستار جالعاسۋدا. مەملەكەتتىك قولداۋدىڭ ارقاسىندا اعىمداعى جىلى وبلىستا 40 ءبىلىم بەرۋ نىسانىنىڭ، ونىڭ ىشىندە 28 مەكتەپتىڭ قۇرىلىسى جۇرگىزىلۋدە. وقۋ جىلىنىڭ باسىندا 6 جاڭا مەكتەپ ىسكە قوسىلادى، جىل سوڭىنا دەيىن تاعى 4 مەكتەپتى تاپسىرۋ جوسپارلانۋدا.