دجو بايدەننىڭ دەنساۋلىعىندا كىنارات جوق.
اقش پرەزيدەنتى دجو بايدەننىڭ دەنساۋلىق جاعدايى جاقسى جانە ءوز مىندەتتەرىن جۇيەلى ورىنداۋ ءۇشىن بارلىق كۇش-جىگەرى جەتكىلىكتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بەيسەنبى كۇنى دارىگەرلەر ۆاشينگتون اۋرۋحاناسىندا اقش-تىڭ 80 جاستاعى باسشىسىن تولىق مەديسينالىق تەكسەرىستەن وتكىزدى. بۇل - دجو بايدەننىڭ پرەزيدەنتتىك قىزمەتكە كىرىسكەننەن بەرگى ەكىنشى تەكسەرىسى.
مەديسينالىق تەكسەرىس اقش پرەزيدەنتىنىڭ بۇرىنعى اۋرۋلارىن انىقتاۋ مەن قازىرگى دەنساۋلىق جاعدايىن باقىلاۋ ماقساتىندا جۇرگىزىلگەن.
«ءوزىنىڭ تولىق قىزمەتتىك مىندەتتەرىن ورىنداۋعا پرەزيدەنتتىڭ كۇش-جىگەرى جەتكىلىكتى»، - دەپ جازدى اق ءۇي دارىگەرى كيەۆين و'كوننور ءوزىنىڭ قىزمەتتىك جازباسىندا.
قۇجاتقا سايكەس، دجو بايدەن قازىرگى ۋاقىتتا جۇرەكتىڭ تۇراقسىز سوعۋى، جوعارى حولەستەرين، ەپيزودتىق قىشقىل رەفليۋكسى، ماۋسىمدىق اللەرگيا، ومىرتقا ءارتريتى جانە اياق بۋىندارىنداعى نەرۆتىك جۇيەلەردىڭ زاقىمدانۋى دەرتتەرى بويىنشا ەم قابىلداپ جاتىر. دەگەنمەن ونىڭ جاعدايى تۇراقتى.
مەديسينالىق تەكسەرۋ كەزىندە دجو بايدەننىڭ ينسۋلت نەمەسە پاركينسون سياقتى نيەۆرولوگيالىق اۋرۋلارمەن اۋىراتىنىن انىقتاۋ ماقساتىندا كۇردەلى زەرتتەۋ جۇرگىزىلگەن. ناتيجەسىندە دارىگەرلەر اقش پرەزيدەنتىنىڭ اتالعان دەرتتەرمەن اۋىرمايتىنىن راستادى.
سوڭعى سايلاۋ كەزىندە دجو بايدەن ساياسي قارسىلاستارىنىڭ اقىل-وي كەمشىلىكتەرى اۋرۋىمەن سىرقاتتانادى دەگەن مالىمدەمەلەرىن جوققا شىعارىپ، كوگنيتيۆتى تەستتەن باس تارتقان بولاتىن.