ەلىمىزدە وتەتىن بەدەلدى الەمدىك تۋرنير «Qazaqstan barysy Grand Slam» دەگەن اتاۋعا يە بولدى
بۇل اتاۋدى قازاقستان دزيۋدو فەدەراسياسىنىڭ باسشىسى ۇسىنعان، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
الەمدىك الامان دوداعا بۇل اتاۋ قالاي تاڭدالعانىن رەداكسيا ءتىلشىسى بەيجىڭ وليمپياداسىنىڭ كۇمىس جۇلدەگەرى، قازاقستان دزيۋدو فەدەراسياسىنىڭ باس حاتشىسى اسحات جىتكەيەۆتەن سۇراعان بولاتىن.
«بۇل اتاۋدى قازاقستان دزيۋدو فەدەراسياسىنىڭ باسشىسى ۇسىندى. قازاق كۇرەسىنەن «Qazaqstan barysy» دەگەن اتاۋمەن وتەتىن جارىس بار. Qazaqstan barysy دەگەن اتاۋ بۇگىندە برەندكە اينالدى. «بەلدەسۋ»، «بارىس» دەگەن سياقتى اتاۋلاردىڭ ءتۇرلى رەڭككە ەنىپ، وزگەرۋىنەن شىققان «Qazaqstan barysy» دەگەن برەند اتاۋ الەمدىك سپورت ارەناسىنا شىعارى انىق. بۇل اتاۋدى ۇسىنۋداعى ماقساتىمىز – قازاق سپورتىن، ونىڭ ىشىندە قازاق دزيۋدوسىن الەمدىك سپورت الەمىنە پاش ەتۋ. IJF ءبىزدىڭ بۇل يدەيامىزدى قولدادى»، - دەدى فەدەراسيانىڭ باس حاتشىسى.