شوپاندار كۇنى اتاپ ءوتىلدى

جەتىسۋ وبلىسىنىڭ مالشىلار قاۋىمى شوپاندار كۇنىن اتاپ ءوتتى

وسىلايشا جىل 12 اي بويى مال سوڭىندا ءجۇرىپ، ءتورت تۇلىكتىڭ سانىن ەسەلەپ وسىرۋمەن اينالىسىپ جاتقان قاراپايىم ەڭبەك ادامدارىنا شاعان تاۋىنىڭ باۋرايىندا قۇرمەت كورسەتىلدى، دەپ حابارلايدى Almaty-akshamy.kz 24.kz-كە سىلتەمە جاساپ. 

وندا قازاقتىڭ ۇلتتىق ويىندارى وينالىپ، ۇزدىك مالشىلار ماراپاتتالدى. سونداي ازاماتتاردىڭ ءبىرى قابدولدا جاماۋبايەۆ. قولىنا قۇرىق ۇستاپ، 40 جىل بويى جىلقى باققان ول، بۇگىندە ەتتى-جۇندى باعىتتاعى مەرينوس قوي تۇقىمىن وسىرۋمەن اينالىسادى. قوجالىعىنداعى قوي سانى مىڭ باسقا جەتكەن.

«ءبىز ءۇشىن شوپاندار تويى ءبىر جىلدىڭ ەسەبى ىسپەتتى. قىستان امان-ەسەن شىعىپ، مالىمىزدى تولدەتىپ، جايلاۋعا كوشتىك. وسىنى ۇمىت قالدىرماي ەلەپ ەسكەرىپ، شاعان تاۋىنىڭ ەتەگىندە، شوپاندار تويىن ۇيىمداستىرعان كوكسۋ اۋدانىنىڭ ازاماتتارىنا ايتار العىسىم شەكسىز»، – دەيدى شارۋا قوجالىعىنىڭ جەتەكشىسى قابدولدا جاماۋبايەۆ.

شوپاندار تويى بۇل ولكەدە سوڭعى رەت 2012 جىلى اتالىپ ءوتىپتى. مىنە ارادا 10 جىلدان استام مەرەكە قايتا جالعاستى. شارا بارىسىندا ۇزدىك شوپاندارعا باعالى سىيلىقتار تابىس ەتىلدى.

- اتام باقتى، اكەم باقتى. ءوزىم باقتىم. ءجۇز جىلعا كەلىپ تۇر. كەيىننەن ەندى جىلقى ساندىك، قوي بايلىق دەگەن بار. قويعا اۋىسىپ كەتتىك. قويدىڭ شارۋاسىمەن ارى قاراي ءجۇرىپ جاتقان جايىمىز بار. بالا-شاعا، اعايىن تۋىس ءبارىن اسىراپ. شوپاندار تويى وتە جاقسى. اۋداننىڭ اكىمدەرىنە، جىگىتتەردىڭ بارلىعىنا راقمەت!-دەپ ريزاشىلىعىن ءبىلدىردى قابدولدا جاماۋبايەۆ.