اقش پەن جۇڭگو TikTok الەۋمەتتىك جەلىسىنە قاتىستى "نەگىزگى قۇرىلىمدىق" كەلىسىمگە قول جەتكىزدى. CNBC جازۋىنشا، بۇل تۋرالى اقش جارجى ءمينيسترى سكوتت بەسسەنت مالىمدەدى، - دەپ حابارلايدى اqshamnews.kz ءتىلشىسى Factcheck.kz-كە سىلتەمە جاساپ.
"بۇل ەكى جەكە كومپانيا اراسىندا بولىپ وتىر، كوممەرسيالىق شارتتارى كەلىسىلىپ قويعان"، – دەدى ول مادريدتە وتكەن اقش پەن جۇڭگو اراسىنداعى كەلىسسوز بارىسىندا.
پرەزيدەنت دونالد ترامپ پەن جۇڭگو پرەزيدەنتى سي سزينپين جۇما كۇنى كەلىسىمنىڭ ناقتى شارتتارىن تالقىلاماق. ترامپ Truth Social پاراقشاسىندا جاستار "ساقتاپ قالعىسى كەلگەن" كومپانياعا قاتىستى كەلىسىم جاسالعانىن جازدى.
بەسسەنتتىڭ ايتۋىنشا، بۇل كەلىسىم TikTok-تىڭ اقش باقىلاۋىنا وتۋىنە جول اشۋى مۇمكىن. ال TikTok ازىرگە تۇسىنىكتەمە بەرگەن جوق. Reuters جازۋىنشا، قىتايدىڭ باس ساۋدا كەلىسسوزشىسى لي چەنگان دا كەلىسىمنىڭ بار ەكەنىن راستاعان ءارى اقش-تى قىتايلىق كومپانيالارعا قىسىم جاساماۋعا شاقىرعان.
بۇل مالىمدەمەلەر اقش پەن جۇڭگو اراسىنداعى كەيىنگى ساۋدا كەلىسسوزدەرى اياسىندا ايتىلدى. سوڭعى ايلاردا تاريفتەر مەن ساۋدا شەكتەۋلەرىنە بايلانىستى ەكى ەل اراسىنداعى قاتىناس شيەلەنىسە تۇسكەن ەدى.
TikTok-تىڭ يەسى ByteDance 17 قىركۇيەككە دەيىن اقش-تاعى بيزنەسىن ساتۋعا ءتيىس بولعان، ايتپەسە قوسىمشانىڭ جۇمىسى ەل اۋماعىندا توقتاتىلۋى مۇمكىن. اقش-تىڭ ساۋدا وكىلى دجەيميسون گرير كەلىسىمگە قول قويۋ ءۇشىن مەرزىمدى ءسال كەيىنگە قالدىرۋ قاجەت بولۋى مۇمكىن ەكەنىن، ءبىراق بۇل شەكسىز سوزىلمايتىنىن ايتقان.
بىلتىر كونگرەسس Apple مەن Google سياقتى قوسىمشا دۇكەندەرىنە TikTok-تى تاراتۋعا تىيىم سالاتىن زاڭ قابىلداعان. ترامپ قاڭتاردا بۇل شەشىمدى ۋاقىتشا توقتاتىپ، ByteDance-كە مامىلە جاساۋعا قوسىمشا 75 كۇن بەرگەن ەدى. كەيىن بۇل مەرزىم بىرنەشە رەت ۇزارتىلدى.
شىلدەدە اقش-تىڭ ساۋدا ءمينيسترى حوۆارد لاتنيك جۇڭگو اقش-قا قوسىمشا اۆتونوميا بەرمەسە، TikTok امەريكادا جابىلاتىنىن مالىمدەگەن. ترامپ ماۋسىمدا Fox News ارناسىنا بەرگەن سۇحباتىندا قوسىمشانى ساتىپ الۋعا دايىن "اسا اۋقاتتى ادامداردىڭ" بارىن ايتقان، ءبىراق ولاردىڭ ەسىمدەرى ءالى جاريالانبادى. بۇعان دەيىن ول TikTok-تىڭ اقش-تاعى نۇسقاسىن Oracle باسشىسى لارري ەلليسون نەمەسە Tesla باسشىسى يلون ماسك ساتىپ الۋى مۇمكىن ەكەنىن دە حابارلاعان. سونىمەن بىرگە Perplexity جاساندى ينتەللەكت ستارتاپى جانە كاسىپكەر فرەنك ماككۋرتتىڭ Project Liberty توبى دا ساتىپ الۋعا ءوتىنىش بەرگەن.