بالالار مەرەكەسى قارساڭىندا ۆاشينگتوندا قازاق بالاباقشاسى اشىلدى.
بۇل – بۇلدىرشىندەردى قازاق تىلىندە تاربيەلەيتىن وسى ايماقتاعى جالعىز ورتالىق. بالالارىنىڭ ءتىلى انا تىلىندە شىققانىن قالايتىن قازاق وتباسىلارى كوبەيگەن، دەپ حابارلايدى Almaty-akshamy.kz.
بۇل بالاباقشادا تاربيە تۇرلەرى ءتول مادەنيەتىمىزگە نەگىزدەلگەن. بۇلدىرشىندەرگە حالقىمىزدىڭ ءسالت-داستۇرى ۇيرەتىلەدى. بالالار حالقىمىزدىڭ ونەرىمەن جاقىن تانىسىپ، ۇلتتىق تاعامدارىمىزدى جاساپ، ءدامىن تاتىپ وتىرادى. 20 جىلدان بەرى امەريكادا تۇرىپ جاتقان 3 بالانىڭ اناسى مادينا كەنجە قىزىن بالاباقشاعا العاشقىلاردىڭ ءبىرى بولىپ اكەلگەن.
مادينا كوشەربايەۆا، اتا-انا:
وكىنىشكە قاراي، ءبىزدىڭ 2 بالامىز اعىلشىن بالاباقشاعا باردى. ول كەزدە قازاقى بالاباقشا بولمادى. ەندى اشىلدى. ەندى بالامىز انا ءتىلىن ۇيرەنەدى، قازاقتارمەن وينايدى. قۋانىشتىمىز.
اسەل كۇزەۋحان شەتەلدە تۋعان بالالارى قازاق تىلىندە تاربيە السا دەپ ارمانداعان. ءبىراق ونداي ورتالىق تاپپاعان سوڭ يگى ءىستى ءوزى قولعا الادى. ءسويتىپ قازاق بالاباقشاسىن اشىپ، بۇلدىرشىندەرگە ۇلتتىق تاربيە بەرۋگە كىرىسەدى. ءقازىر كىشكەنتايلارىن وسى تاربيە ورداسىنا بەرگىسى كەلەتىن اتا-انا كوپ، – دەيدى ول.
اسەل كۇزەۋحان، بالاباقشا مەڭگەرۋشىسى:
ءبىزدىڭ مىنا تۇرىپ جاتقان جەرىمىزدى قاراساڭىز، شاعىن قازاقستان دەۋگە دە بولادى. سوڭعى ۋاقىتتا امەريكاعا كەلىپ ءومىر سۇرەتىن قازاقتار وتە كوپ. ءبىزدىڭ اينالامىزدىڭ وزىندە 30-40 وتباسى تۇرامىز. سولاردىڭ ءوزىنىڭ كوبى بالالارىن قازاق بالاباقشاسىنا بەرگىسى كەلەدى.
اقش-تا مەكتەپكە دەيىنگى بالالاردى تاربيەلەۋ ورتالىقتارىنىڭ اي سايىنعى تولەمى وتە قىمبات، شامامەن 2000 دوللار بولادى. ونىڭ ۇستىنە كوبىندە ىستىق تاماق بەرىلمەيدى. ال قازاق بالاباقشاسىنىڭ قۇنى ەداۋىر ارزان ءارى ۇلتتىق مازىرگە نەگىزدەلگەن ءۇش مەزگىل تاماعى بار. اسەل كۇزەۋحان بولاشاقتا دومبىرا جانە بي ۇيىرمەسىن اشىپ، بالاباقشانى ۇلكەن قازاقى ورتالىققا اينالدىرۋدى كوزدەپ وتىر.