الماتى پوليسيا دەپارتامەنتى جابىرلەنۋشىنىڭ “باسشىسى” اتىنان ءجيى ارەكەت ەتەتىن الاياقتاردىڭ حات-حابارلامالارى بار فوتوكوللاج دايىندادى.
ديالوگتا جالعان باستىق قاراماعىنداعى قىزمەتكەرىنە قۇقىق قورعاۋ ورگاندارى جۇرگىزىپ جاتقان تەكسەرۋ جۇمىستارى تۋرالى ايتىپ، تالاپ قويادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
"الماتى پوليسياسى، قازىرگى ۋاقىتتا، كۇدىكتىلەر Whatsapp جانە Telegram مەسسەندجەرلەرىندە اككاۋنت اشىپ، اۆاتارلارىنا مەملەكەتتىك مەكەمە نەمەسە جەكە ۇيىم باسشىسىنىڭ سۋرەتىن قويىپ، كەنەتتەن “ق ر ۇقك-نەن تەكسەرىس” كەلىپ جاتىر دەپ، قول استىنداعى قىزمەتكەرلەرگە اقشانى جەدەل تۇردە ءارتۇرلى ءۇشىنشى تۇلعالاردىڭ شوتتارىنا جىبەرۋ قاجەتتىگى تۋرالى جازاتىن الاياقتىق ارەكەتتەرى جيىلەپ كەتكەنىن ەسكەرتەدى. وكىنىشكە قاراي، بۇل تىزبەكتى پايدالانىپ الدايتىن جاعدايلار ءجيى كەزدەسەدى. سوندىقتان ازاماتتاردىڭ الاياقتاردىڭ ارانداتۋشىلىقتارىنا بوي الدىرماي، مۇنداي حابارلامالار كەلگەن كەزدە وقيعا تۋرالى ءبىرىنشى كەزەكتە ءوزىنىڭ تىكەلەي باسشىسىنا حابارلاۋى وتە ماڭىزدى، - دەدى الماتى قالالىق پوليسيا دەپارتامەنتى باستىعىنىڭ ورىنباسارى قۋاتبەك ناۋاتوۆ.