بۇيرىق لاڭكەستىك وقيعانىڭ 20 جىلدىعى قارساڭىندا شىعىپ وتىر.
اقش پرەزيدەنتى دجو بايدەن 2001 جىلعى 11 قىركۇيەكتە بولعان لاڭكەستىك شابۋىل جونىندەگى قۇپيا قۇجاتتاردى جاريا ەتۋدى بۇيىراتىن قۇجاتقا قول قويدى، دەپ حابارلايدى Almaty-akshamy.kz Baq.kz-كە سىلتەمە جاساپ.
ناقتىراق ايتقاندا، ول ادىلەت مينيسترلىگى مەن وزگە دە قۇزىرەتتى ورگاندارعا فبر تەرگەۋى جونىندەگى قۇجاتتاردى جاريا ەتۋ تۇرعىسىنان زەردەلەۋدى تاپسىردى.
ازاتتىقتىڭ مالىمەتىنە قاراعاندا، بۇيرىق لاڭكەستىك وقيعانىڭ 20 جىلدىعى قارساڭىندا شىعىپ وتىر. وتكەن ايدا لاڭكەستىك شابۋىل قۇرباندارىنىڭ تۋىستارى بايدەننەن قۇپيا قۇجاتتاردى جاريا ەتپەيىنشە 11 قىركۇيەك وقيعاسىن ەسكە الۋ شاراسىنا كەلمەۋدى تالاپ ەتكەن. ولار فبر قۇجاتتارىندا لاڭكەستىك شابۋىل ارتىندا ساۋد ارابياسى تۇرعانىن كورسەتەتىن ايعاقتار بار دەپ سەنەدى.
«قۇپيا قۇجاتتاردى جاريا ەتۋ ۇلتتىق قاۋىپسىزدىككە نۇقسان كەلتىرۋى مۇمكىن بولعانىمەن، بۇقارانىڭ جاريالىققا دەگەن مۇقتاجدىعى ۇلتتىق قاۋىپسىزدىك مۇددەسىنەن باسىم بولاتىن تۇستا اقپارات قۇپيا كۇيىندە قالماۋى كەرەك»، - دەدى بايدەن ءوز بۇيرىعىندا.
وسى بۇيرىقتان كەيىن باس پروكۋراتۋرا قاي قۇجاتتى اشكەرە ەتۋگە بولاتىنىن، قاي قۇجاتتى ءالى دە قۇپيا ۇستاۋ قاجەتىن انىقتاپ، ءبىرىنشىسىن التى اي ىشىندە جاريالاۋى ءتيىس.
2001 جىلى 11 قىركۇيەكتە ءبىر توپ لاڭكەس جولاۋشى ۇشاقتارىن باسىپ الىپ، ولاردى نيۋ-يورك قالاسىنداعى ساۋدا ۇيىنە باعىتتاعان. سالدارىنان 3 مىڭعا تارتا ادام قازا تاپتى.
ۇشاقتى ۇرلاعانداردىڭ ىشىندە 15ء-ى ساۋد ارابياسىنىڭ ازاماتى بولعان. شابۋىلدى موينىنا العان «ءال-قايدا» ۇيىمىنىڭ جەتەكشىسى ۋساما بين لادەن دە ساۋد ارابياسىنىڭ ازاماتى.
ساۋد ارابياسى شابۋىلعا قاتىسى بارىن جوققا شىعارادى.