جاۋىن-شاشىن مولشەرگە ساي بولماق.
سينوپتيكتەر اقپانعا ارنالعان اۋا رايى بولجامىن جاريالادى، دەپ حابارلايدى Almaty-akshamy.kz.
سينوپتيكتەردىڭ مالىمەتىنشە، اقپاننىڭ ءبىرىنشى ونكۇندىگىندە رەسپۋبليكانىڭ وڭتۇستىك جارتىسىنىڭ تۇرعىندارىن جىلى جانە جاۋىن-شاشىندى اۋا رايى كۇتەدى. وڭتۇستىك سيكلونداردىڭ ءجيى شىعۋى قارقىندى جاۋىن-شاشىننىڭ تۇسۋىنە اكەلەدى، قازاقستاننىڭ وڭتۇستىگى مەن وڭتۇستىك-شىعىسىنداعى تاۋلى اۋداندارىندا قاتتى جاۋىن-شاشىن (جاڭبىر، قار) كۇتىلەدى. اۋا تەمپەراتۋراسى تۇندە -2+5°س-قا دەيىن، كۇندىز +5+12 گرادۋسقا دەيىن جوعارىلايدى. ونكۇندىكتىڭ سوڭىندا قايتادان تۇندە -3-15 گرادۋسقا دەيىن، كۇندىز 0،+8 گرادۋسقا دەيىن سالقىندايدى.
«ەلىمىزدىڭ باتىس ايماقتارىنا سولتۇستىك-باتىس سيكلونمەن بايلانىستى اتموسفەرالىق فرونتتار اسەر ەتەدى، ءبىرىنشى ونكۇندىكتە باتىس ايماقتاردىڭ تۇرعىندارىن اۋا رايىنىڭ تۇراقسىز سيپاتى، جاڭبىر مەن جىلبىسقى قار تۇرىندەگى ارالاس جاۋىن-شاشىن مەن ەكپىندى جەل كۇتەدى. اۋا تەمپەراتۋراسىنىڭ كۇندىزگى فونى -3+5 گرادۋسقا شەگىندە بولجانادى»، - دەلىنگەن حابارلامادا.
ق ر قالعان ايماقتارىندا ءبىرىنشى ونكۇندىكتىڭ ءبىرىنشى جارتىسىندا ءسىبىر انتيسيكلونىنىڭ اسەرىمەن ايازدى، نەگىزىنەن جاۋىن-شاشىنسىز اۋا رايى ساقتالادى. كەزەڭنىڭ ەكىنشى جارتىسىندا ءسىبىر انتيسيكلونى السىرەيدى، جەرورتا تەڭىزى اۋداندارىنان سيكلون رەسپۋبليكانىڭ سولتۇستىك-باتىسىنا قاراي جىلجيدى، ەلىمىزدىڭ سولتۇستىك جارتىسىندا اتموسفەرالىق فرونتتاردىڭ كۇشەيۋىمەن قار جاۋۋى، بۇرقاسىن، جەلدىڭ كۇشەيۋى 15-25 م/س دەيىن بولجانادى.
اۋا تەمپەراتۋراسى جوعارىلايدى:
ەلىمىزدىڭ سولتۇستىگىندە تۇندە -20-28°س-تان -15-20 گرادۋسقا دەيىن، كۇندىز -8-18 گرادۋستان -5-10 گرادۋسقا دەيىن؛
ورتالىق ايماقتاردا اۋا تەمپەراتۋراسى تۇندە -13-28 گرادۋستان -7-15 گرادۋسقا دەيىن، كۇندىز -7-12 گرادۋستان -1-7گرادۋسقا دەيىن اۋىتقيدى؛
ەلىمىزدىڭ شىعىسىندا اۋا تەمپەراتۋراسىنىڭ باسىم فونى تۇندە
-15-28 گرادۋس، كۇندىز -5-15 گرادۋس شاماسىندا بولجانادى.
«اۋانىڭ ورتاشا ايلىق تەمپەراتۋراسى رەسپۋبليكانىڭ باسىم بولىگىندە نورما شاماسىندا، شىعىس قازاقستان وبلىسىندا، اباي وبلىسىنىڭ باسىم بولىگىندە، پاۆلودار وبلىسىنىڭ سولتۇستىك-شىعىس جارتىسىندا، ماڭعىستاۋ وبلىسىنىڭ وڭتۇستىك-شىعىسىندا، اقتوبە وبلىسىنىڭ قيىر وڭتۇستىگىندە، قىزىلوردا، تۇركىستان، جامبىل، الماتى وبلىستارىنىڭ وڭتۇستىك جارتىسىندا جانە جەتىسۋ وبلىسىنىڭ وڭتۇستىك-شىعىس جارتىسىندا نورمادان 1 گرادۋستان جوعارى بولادى دەپ كۇتىلەدى»، - دەلىنگەن "قازگيدرومەت" حابارلاماسىندا.
اقپاندا جاۋىن-شاشىن مولشەرى رەسپۋبليكانىڭ باسىم بولىگىندە نورما شاماسىندا، تۇركىستان، جامبىل وبلىستارىندا، قىزىلوردا، الماتى وبلىستارىنىڭ باسىم بولىگىندە، شىعىس قازاقستان وبلىسىنىڭ وڭتۇستىك-شىعىس جارتىسىندا، اباي وبلىسىنىڭ قيىر وڭتۇستىك-شىعىسىندا جانە جەتىسۋ وبلىسىنىڭ وڭتۇستىك-شىعىس جارتىسىندا نورمادان كوپ بولادى دەپ بولجانىپ وتىر.
اقپاننىڭ ەكىنشى جانە ءۇشىنشى ونكۇندىكتەرىندە رەسپۋبليكا بويىنشا اۋا-رايىنىڭ تۇراقسىز سيپاتى بولجانادى: ەلىمىزدىڭ باسىم بولىگىندە نەگىزىنەن قارمەن بۇرقاسىن، ق ر وڭتۇستىگىندە جاۋىن-شاشىن (جاڭبىر، قار)، تۇمان، كوكتايعاق كۇتىلەدى.
اۋا تەمپەراتۋراسىنىڭ اۋىتقۋى كۇتىلەدى:
ەلىمىزدىڭ باتىس وڭىرلەرىندە تۇندە -15-25 گرادۋستان -7-15 گرادۋسقا دەيىن، كۇندىز -5-10 گرادۋستان -5+5 گرادۋسقا دەيىن؛
رەسپۋبليكانىڭ سولتۇستىك، ورتالىق جانە شىعىس وڭىرلەرىندە تۇندە -20-30 گرادۋستان -10-15 گرادۋسقا دەيىن، كۇندىز -10-15 گرادۋستان -2-7 گرادۋسقا دەيىن؛
ق ر وڭتۇستىگىندە، وڭتۇستىك-شىعىسىندا تۇندە -10-18 گرادۋستان 0،-5 گرادۋسقا دەيىن، كۇندىز 0،-5 گرادۋستان +3+10 گرادۋسقا دەيىن.