اقجول گەروي «ناعىز باتىر» ەكەن

بۇگىنگى كۇننىڭ باتىرى: الماتى وبلىسىندا سەگىزىنشى سىنىپ وقۋشىسى باقىلاۋسىز قالعان اۆتوبۋستىڭ جولاۋشىلارىن امان الىپ قالدى

24 قاراشا كۇنى ىلە اۋدانىنىڭ تۇرعىندارىمەن ەسەپ بەرۋ كەزدەسۋىندە مارات سۇلتانعازييەۆ ءوزىنىڭ ارەكەتىمەن اۋىر وقيعانىڭ الدىن العان جاس باتىردى قۇتتىقتادى. 22 قاراشادا مەكتەپتەن قايتىپ كەلە جاتقان بالا ونداعان جولاۋشى مەن باقىلاۋسىز قالعان اۆتوبۋس جۇرگىزۋشىسىنىڭ ءومىرىن ساقتاپ قالدى، دەپ حابارلايدى Almaty-akshamy.kz.

ەگەر سەگىزىنشى سىنىپ وقۋشىسىنىڭ باتىل ارەكەتى بولماسا، باسقارۋدان شىققان كوپ توننالىق كولىك ۇلكەن جىلدامدىقپەن تۇرعىن ۇيلەرگە كىرىپ كەتۋى مۇمكىندىگى جوعارى بولاتىن. سوندا وقيعانىڭ سالدارى الدەقايدا اۋىر بولار ەدى. ءبىراق باقىتىمىزعا وراي، قايعىلى جاعدايدىڭ الدىن الدى. قوعامدىق كولىك جۇرگىزۋشىسىنىڭ كەنەتتەن جاعدايى ناشارلاعانىن كورگەن وقۋشى ءجۇرىپ بارا جاتقان اۆتوبۋستىڭ باسقارۋ سالونىنا كىرىپ، تەجەگىشتى دەر كەزىندە باسىپ، كولىكتى توقتاتىپ ۇلگەرگەن.

№24 مەكتەپ-ليسەيىنىڭ 8-سىنىبىندا وقيتىن كەيىپكەرىمىز اقجول - مەكتەپتىڭ قوعامدىق ومىرىنە بەلسەنە ارالاسىپ، سىنىپتاستارى مەن كىشى بالالارعا كومەكتەسۋگە ءارقاشان دايىن. اقجول ورتاسىمەن تەز ءتىل تابىساتىن، اشىق بالا. 
ەرلىگى ءۇشىن سەگىزىنشى سىنىپ وقۋشىسى اقجول وبلىس اكىمى مارات سۇلتانعازييەۆتىڭ قولىنان «العىس حات» پەن iPhone 15 مودەلىن سالتاناتتى تۇردە الدى.

«مۇنداي ارەكەتتەر ەرەكشە العىس پەن قۇرمەتكە لايىق. ءبىز بارشا جاستارعا ۇلگى بولۋى ءتيىس ءوڭىرىمىزدىڭ جاس باتىرىن ماقتان تۇتامىز»، - دەدى الماتى وبلىسىنىڭ اكىمى.

سونداي-اق سۇلتانعازييەۆ بۇل ءىس ەرلىك پەن باتىلدىقتىڭ، جاۋاپتى ءىستىڭ ۇلگىسى ەكەنىن اتاپ ءوتتى. 
اقجول «ناعىز باتىر»، شىنىندا دا جاقسى اتا-انانىڭ جاقسى بالا تاربيەلەيتىنىن دالەلدەدى.