سينوپتيكتەر وسى جازداعى اۋا-رايى 43 گرادۋسقا دەيىن كوتەرىلەدى دەگەن بولجام ايتۋدا. ياعني الداعى ۋاقىتتا اپتاپ ىستىق ادەتتەگىدەي قاتتى بولماق.
قالالىق N8 ەمحانا ديرەكتورىنىڭ ەمدەۋ جۇمىسى جونىندەگى ورىنباسارى گۇلميرا بايچۋلاكوۆا اپتاپ كەزىندە ءار ادام، اسىرەسە كۇن ىسىسا دەنساۋلىعى سىر بەرەتىن كىسىلەر ساقتاۋعا ءتيىس ەرەجەلەردى ايتىپ بەردى.
— كۇن قاتتى ىسىعاندا ءتىپتى دەنى ساۋ ادامنىڭ دەمى تارىلىپ، جۇرەگى قاعا باستايدى، اۋا جەتپەي، باسى اينالىپ، كەۋدەسى قىسۋى مۇمكىن. ويتكەنى ىستىق جاز جۇرەككە اۋىر تيەدى. جۇرەك-قان تامىرلارى اۋرۋى بار ادامدار وسى مەزگىلدە اسا ءالسىز، دەگەنمەن دەنى ساۋلار دا اباي بولعانى ءجون، - دەيدى دارىگەر.
دارىگەر كەڭەستەرى:
* ساعات 12.00 مەن 16.00 اراسىندا دالاعا شىقپاۋعا تىرىسىڭىز. ال سىرتتا جۇرۋگە ءماجبۇر بولساڭىز، كولەڭكە تاسالاپ، ارا-تۇرا ساكىگە وتىرىپ دەمالىڭىز.
* ءتۇسى اشىق، ىستىقتاتپايتىن-تەرلەتپەيتىن كيىم كيىپ ءجۇرىڭىز.
* جاعاسى، بەلى قىساتىن كيىمنەن باس تارتىڭىز.
* ەت پەن مال مايىن ازىراق جەۋگە تىرىسىڭىز. ءسۇت پەن كوكونىستەن جاسالعان تاعامداردى تۇتىنعان ءجون. راسيونىڭىزداعى اقجەلكەن، كينزا، اسكوكتى مولايتىڭىز. قاتتى تويىپ تاماق جەمەڭىز. تۇزدى ازايتىڭىز.
* كوبىرەك سۋ ءىشىڭىز. ءبىراق گازدالعان جانە وندىرىستىك كۆاستان پايدا بولمايتىنىن ەسكەرىڭىز. ەڭ جاقسىسى – تازا سۋ، مورس، كوك شاي. سونىمەن قاتار جەبىرشوپ، جالبىز، مەليسسانى قايناتىپ، تۇندىرىپ، ليمون مەن مۇز كەسەكتەرىن قوسىپ ءىشۋ دەنساۋلىققا پايدالى. ال قۇرامىندا از بولسا دا الكوگولى بار سىرا، كوكتەيل، شاراپ اعزانىڭ سۋسىزدانۋىنا اكەلەتىنىن ەستەن شىعارماڭىز.
* جاعاجايدا بولعاندا سۋعا سۇڭگىپ كەتۋگە اسىقپاڭىز. دەنە تەمپەراتۋراسىنىڭ كۇرت اۋىتقۋىنان جۇرەك شىداماي، تالىپ كەتۋى ىقتيمال. مۇنداي جاعداي ءتىپتى جاس، ساۋ ادامدا بولۋى مۇمكىن.
* كۇنى بويى كوشەدە جۇرگەندە بۇرىككىشپەن سۋ سەبىنىپ وتىرۋعا بولادى. ونىڭ ىشىنە جىلى سۋ قۇيىپ الىڭىز – سالقىن سۋعا قاراعاندا تەرىگە سول پايدالىراق.