جازعى وليمپيادا تاريحىنداعى بيىلعى دوداعا ەلىمىزدىڭ اتىنان 80 سپورتشى قاتىسادى.
وليمپيادانىڭ اشىلۋ سالتاناتىندا قازاقستاننىڭ تۋىن الىپ شىعۋ قۇرمەتى بوكسشى اسلانبەك شىمبەرگەنوۆ پەن جەڭىل اتلەت ولگا سافرونوۆاعا بەرىلگەن.
26 شىلدە مەن 11 تامىز ارالىعىندا بارلىق سپورت تۇرىنەن جارىستاردى ەلىمىزدىڭ Qazaqstan، Qazsport، "حابار"، "ەل ارنا"، Jibek Joly تەلەارنالارى تىكەلەي ەفيردە كورسەتەدى.
قازاقستان اتىنان بيىلعى وليمپيادا ويىندارىنا بارعان 80 سپورتشىنىڭ 54ء-ى ءبىرىنشى رەت قاتىسادى.
«بايگە بەرەم جىعىلعان پالۋانعا دا...»
ق ر مادەنيەت جانە سپورت ءمينيسترىنىڭ بۇيرىعىنا سايكەس، سپورتشىنىڭ العان جۇلدەسىنە بايلانىستى سىياقى سوماسى 3 مىڭنان 250 مىڭ دوللارعا دەيىن بولادى. تولەمدەر تەك مەدال يەلەرىنە عانا ەمەس، ءتورتىنشى، بەسىنشى نەمەسە التىنشى ورىنداردى يەلەنگەندەرگە دە بەرىلەدى. دەگەنمەن، بۇل جاعدايدا سىياقى ايتارلىقتاي از بولادى. سونداي-اق تولەمدەردىڭ مولشەرى وليمپيادا، پاراليمپيادا جانە سۋردليمپيادا ويىندارىنىڭ سپورتشىلارى ءۇشىن بىردەي بولماق.
ءبىرىنشى، ەكىنشى جانە ءۇشىنشى ورىندارعا يە بولعان سپورتشىلارعا سايكەسىنشە 250 مىڭ، 150 مىڭ جانە 75 مىڭ اقش دوللارى تولەنەدى.
ال مەدال بەرىلمەيتىن ءتورتىنشى، بەسىنشى جانە التىنشى ورىندار ءۇشىن مەملەكەتتەن سايكەسىنشە 30 مىڭ، 10 مىڭ جانە 5 مىڭ اقش دوللارى كولەمىندە اقشالاي سىياقى قاراستىرىلعان.
وليمپيادا جايلى دەرەكتەر
جازعى وليمپيادا بۇعان دەيىن 32 رەت وتكەن.
پاريج بۇعان دەيىن 1900 جانە 1924 جىلدارى جازعى وليمپيادا ويىندارىن قابىلداعان بولاتىن جانە 2024 جىلعى ويىندار اياقتالعاننان كەيىن لوندوننان كەيىن ءۇش رەت جازعى وليمپيادا ويىندارىن قابىلداعان ەكىنشى قالاعا اينالادى.
قازىرگى ويىندارعا ىرىكتەۋ تۋرنيرلەرى شىلدە ايىنىڭ باسىنا دەيىن ءوتتى، ال قازاقستاندىق سپورتشىلار ىرىكتەۋ كەزەڭىن 25 سپورت ءتۇرى بويىنشا 80 ليسەنزيامەن اياقتادى. بۇل ويىندار قازاقستان ءۇشىن تاۋەلسىزدىك العاننان بەرى سەگىزىنشى وليمپيادا بولادى.
ۇكىلەگەن ۇمىتتەر
حالىقارالىق وليمپيادا كوميتەتى پاريجدەگى وليمپيادا ويىندارىنا قاتىساتىن قازاقستاندىق تانىمال سپورتشىلاردىڭ ءتىزىمىن جاريالادى. بۇل تىزىمگە بارلىعى 12 سپورتشى ەنگەن. ءبىراق تەننيسشى ەلەنا رىباكينانىڭ دەنساۋلىعىنا بايلانىستى قاتىسپايتىنى كەشە ءمالىم بولدى.
تىزىمگە ەنگەندەر ەلىمىز جۇلدەدەن ءۇمىتتى ساناپ وتىرعان سپورتشىلار. ولاردىڭ قاتارىندا بوكسشى، ديۋدوشى، سپورتتىق گيمناستيكا، تەننيس، جەڭىل اتلەتيكا، سەمسەرلەسۋ جانە كۇرەس تۇرلەرىنىڭ وكىلدەرى بار.
نازىم قىزايباي – بوكس، 50 كيلو
48 كيلوعا دەيىنگى سالماقتا 2014 جانە 2016 جىلى الەم چەمپيونى اتانعان وتانداسىمىز العاش رەت وليمپيادا ويىندارىندا ب ا ق سىنايدى. بۇعان دەيىن بىردە ءبىر رەت جولى تۇسپەگەن ەدى.
ۆالەنتينا حالزوۆا – بوكس، 75 كيلو
69 كيلوعا دەيىنگى سالماقتا 2016 جىلى الەم چەمپيونى بولعان ۆالەنتينا دا العاشقى وليمپياداسىنا قاتىسادى.
ساكەن بيبوسىنوۆ – بوكس، 51 كيلو
مىرزاعالي ايتجانوۆ شاكىرتى ەكىنشى وليمپياداسىنا اتتاندى. 2021 جىلى توكيودا قولا جۇلدەگەر اتانعان. بۇل جولى التىن الۋدى باستى ماقسات تۇتادى.
ءابيبا ءابۋجاقىنوۆا – دزيۋدو، 48 كيلو
دزيۋدو رەيتينگىندە ءۇشىنشى تۇرعان ءابيبا دا العاشقى وليمپياداسىندا ب ا ق سىنايدى. ول كەيىنگى ەكى بىردەي الەم چەمپيوناتىندا قولا جۇلدە جەڭىپ العان ەدى.
ەلدوس سمەتوۆ – دزيۋدو، 60 كيلو
ۇلتتىق قۇراماداعى ەڭ تاجىريبەلى دزيۋدوشى وسىعان دەيىن ەكى وليمپيادا ويىندارىندا قورجىنىمىزعا جۇلدە سالعان. 2016 جىلى ريودا كۇمىس السا، 2021 جىلى توكيودا قولا مەدالدى قاناعات تۇتتى. ەلدوس ءۇشىن پاريج وليمپياداسىنا بارۋ وڭاي بولعان جوق. رەيتينگىلىك جارىستاردان بولەك، ءوزارا وتكەن ىشكى بەلدەسۋلەر ارقىلى دا مىقتىنى انىقتادى.
ميلاد كاريمي – سپورتتىق گيمناستيكا، كوپسايىس
2023 جىلعى الەم چەمپيوناتىندا ميلاد قازاقستان قۇراماسىنا تاريحي جۇلدە سىيلادى. ول ەركىن جاتتىعۋدا قولا جۇلدەگەر اتاندى. 26 جاستاعى سپورتشى ەكىنشى وليمپياداسىندا ب ا ق سىنايدى.
نورا دجەرۋتو – جەڭىل اتلەتيكا، 3000 مەترگە كەدەرگىلەرمەن جۇگىرۋ
كەنيالىق جەلاياق 2022 جىلدىڭ قاڭتار ايىنان باستاپ قازاقستان اتىنان جارىستارعا قاتىسۋعا مۇمكىندىك الدى. سول جىلى الەم چەمپيوناتىندا تاريحي التىن جۇلدەگە قول جەتكىزدى، رەكورد جاڭارتتى. كەيىننەن دوپينگ داۋىنا ىلىگىپ، جارىستاردان ۋاقىتشا شەتتەتىلدى.
2024 جىلعى 25 ماۋسىمدا حالىقارالىق اربيتراجدىق سوت شەشىم شىعاردى. ولاردىڭ شەشىمى بويىنشا World Athletics-تىڭ 2023 جىلعى 24 قاراشادا دوپينگ قولدانۋى جايلى بەرگەن اپەللياسياسىن قابىلدامادى. وسىلايشا ۇلتتىق قۇراما سپورتشىسى كۇدىكتەن تولىعىمەن اقتالدى.
رۋسلان قۇربانوۆ – سەمسەرلەسۋ، شپاگا
2023 جىلى الەم چەمپيوناتىندا جۇلدە العان سپورتشى قازاقستان قۇراماسىنا تاريحي جەتىستىك سىيلادى. ول ەكىنشى وليمپياداسىندا ب ا ق سىنايدى.
ايدوس سۇلتانعالي – گرەك-ريم كۇرەسى، 60 كيلو
بالۋان ەكى رەت الەم چەمپيوناتىندا قولا جۇلدەگەر اتاندى. الايدا العاش رەت وليمپيادا ويىندارىندا ب ا ق سىنايدى. ءتورتجىلدىقتىڭ باستى دوداسىنا قاتىسۋدى 15 جاسىنان باستاپ ارمانداعان.
دەمەۋ جادىرايەۆ – گرەك-ريم كۇرەسى، 77 كيلو
قازاق بالۋانى 2017 جىلى الەم چەمپيوناتىندا 71 كيلوعا دەيىنگى سالماقتا كۇمىس الدى. توكيودا 77 كيلوعا دەيىنگى سالماقتا بەلدەسىپ، جۇلدەگە ىلىكپەدى. پاريجدە دە وسى سالماقتا بوز كىلەمگە شىعادى.
ازامات داۋلەتبەكوۆ – ەركىن كۇرەس، 86 كيلو
2022 جانە 2023 جىلعى الەم چەمپيوناتىندا قولا جۇلدەگە قول جەتكىزگەن ازامات ءوز سالماعىندا فاۆوريتتەر قاتارىندا. العاشقى وليمپياداسىندا جۇلدە ءۇشىن كۇرەسەدى.
وليمپيادانىڭ بيۋدجەتى قانشا؟
پاريج-2024 وليمپياداسىنىڭ باستاپقى بيۋدجەتى، ياعني تاپسىرىس بەرگەن كەزدەگى جالپى قۇنى 6،2 ميلليارد ەۆرو دەپ باعالانعان. IFRAP تاۋەلسىز ساراپتاما ورتالىعىنىڭ مالىمەتى بويىنشا ءقازىر بۇل سوما 2 ەسەلەنگەن. ءقازىر 2024 جىلعى وليمپيادا ويىندارىنىڭ بيۋدجەتى 11 ملرد ەۆرو ەكەنى بەلگىلى بولدى. پاريج وليمپياداسىنىڭ اشىلۋ سالتاناتىنىڭ قۇنى 122 ميلليون ەۆرو.