اپتاپ ىستىقتان ەۋروپانىڭ ەڭ اتاقتى تۋريستىك ورىندارى جابىلىپ جاتىر

ەۋروپاداعى اپتاپ ىستىقتان ايگىلى تۋريستتىك ورىندار جابىلىپ جاتىر.    

جىلىنا ميلليونداعان تۋريست باراتىن پارفەنون عيباداتحاناسى ورنالاسقان افينىداعى اكروپول تۇستەن باستاپ كەشكى بەسكە دەيىن جابىق بولادى ەكەن. اۋا رايى بولجامى بويىنشا افينىداعى اپتاپ ىستىق + 41 گرادۋسقا دەيىن بارادى. ونىڭ ۇستىنە اكروپول اشىق جەردە ورنالاسقان، وندا كۇننەن تىعىلىپ، سايا قىلاتىن كولەڭكەلى ورىن دا تابا المايسىڭ. سوندىقتان مۇنداي شەكتەۋ امالدىڭ جوعىنان سالىنىپ وتىر، دەپ حابارلايدى Almaty-akshamy.kz Tengritravel.kz.-كە سىلتەمە جاساپ.

يتاليادا دا اۋانىڭ ىستىعى 45 گرادۋسقا دەيىن باراتىنى ايتىلدى. مۇندا ءقازىردىڭ وزىندە كوليزەيگە كىرە المايسىز. سونىمەن قوسا، يسپانيا، فرانسيا، گەرمانيا مەن پولشادا دا اپتاپ ىستىق كۇتىلەدى. بۇل ەلدەردەگى اۋانىڭ ىسۋى ەۋروپا رەكوردى - سەلسي بويىنشا 48،8 گرادۋستان اسىپ ءتۇسۋى مۇمكىن. سوڭعى رەت مۇنداي ىستىق 2021 جىلى سيسيليادا تىركەلگەن ەدى.

ال يسپانيادا دەمالۋشىلارعا جاعاجايدان قاشۋ كەرەك بولاتىنى ايتىلدى، ويتكەنى قۇمنىڭ قىزۋى 60 گرادۋسقا دەيىن بارادى ەكەن، ال اۋا تەمپەراتۋراسى +48. ازىرگە مۇنداي اۋا رايى تەك ەلدىڭ باتىسىنداعى تەڭىزبەن شەكتەسپەيتىن ەسترەمادۋرا اۋماعىندا عانا تىركەلىپ وتىر. دەگەنمەن تۋرسيتەرگە بارىنشا جاعاجايدان الىس بولۋ كەرەگى ەسكەرتىلىپ جاتىر.

ەسكە سالايىق، ەۋروپاداعى اپتاپ ىستىقتىڭ سەبەبى "سەربەر" انتيسيكلونى بولىپ وتىر. ىستىق اۋا اعىمدارى ەۋروپاعا ساحارادان بارادى.