جىلۋ جەلىلەرىنە قاتىستى ماسەلەلەر شەشىلدى.
پرەمەر-مينيستردىڭ ورىنباسارى - ساۋدا جانە ينتەگراسيا ءمينيسترى سەرىك ءجۇمانعاريننىڭ بولجاۋىنشا، اپتا سوڭىنا دەيىن ەكىباستۇزداعى بارلىق ۇيگە جىلۋ بەرىلەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
مينيستر جىلۋ وشىرىلگەندە اقپاي قالعان سۋلار قۇبىردا قاتىپ قالعانىن ايتتى.
«سوندىقتان جىلۋ بەرۋ كەزىندە باتارەيالار جارىلا باستادى. ياعني، جىلۋ ۇيلەرگە جەتكىزىلدى، جىلۋ جەلىلەرىنە قاتىستى ماسەلەلەر شەشىلدى. ەندىگى ماسەلە تۇرعىن ۇيلەردىڭ ىشىندە. ءقازىر وقيعا ورنىندا جۇرگەندەر باتارەيالاردى، كرانداردى، ىشكى جىلىتۋ جۇيەلەرىن اۋىستىرۋعا بار كۇشىن سالىپ جاتىر. سوندىقتان بۇل ماسەلە الداعى ەكى كۇندە شەشىلەدى دەپ ويلايمىن»، - دەدى س. جۇمانعارين ۇكىمەتتە تىلشىلەرگە بەرگەن سۇحباتىندا.
سەرىك ءجۇمانعاريننىڭ ايتۋىنشا، ەكىباستۇزدا پرەمەر-مينيستردىڭ ءبىرىنشى ورىنباسارى رومان سكليار، ەنەرگەتيكا ۆيسە-مينيسترى جاندوس نۇرماعانبەتوۆ، «ورتالىق ازيا ەنەرگەتيكالىق كورپوراسياسى» اق (واەك) قۇرىلتايشىلارىنىڭ ءبىرى ءجۇر.
«الدىمەن ماسەلەنى تولىق شەشىپ، جىلۋدى بارلىق پاتەرگە جەتكىزۋ كەرەك، باتارەيالاردى جوندەۋ كەرەك. سودان كەيىن عانا كىنالىلەر اتالادى، كىنالىلەر وكىنەدى دەپ ويلايمىن»، - دەيدى ۆيسە-پرەمەر.
بۇعان دەيىن سەرىك جۇمانعارين الەكساندر كلەبانوۆتىڭ ەكىباستۇز جەو-سىن مەملەكەتكە ءبىر تەڭگەگە ساتۋعا دايىندىعى تۋرالى پىكىر بىلدىرگەن ەدى.