«اپگرەيد» كورمەسىندە تاۋەلسىزدىك كەزەڭىندەگى تۋىندىلار ۇسىنىلدى

كورمەگە تۇڭعىش رەت قويىلعان سۋرەتتەر دە بار

تەمىرتاۋ قالاسىنداعى تاريحي-ولكەتانۋ مۋزەيىندە ۇيىمداستىرىلعان «اپگرەيد» قالالىق سۋرەتشىلەر كورمەسىندە كەلۋشىلەر نازارىنا ەل تاۋەلسىزدىگى كەزەڭىندە دۇنيەگە كەلگەن ۇزدىك جۇمىستار توپتاماسى ۇسىنىلدى، دەپ حابارلايدى Almaty-akshamy.kz Egemen.kz-كە سىلتەمە جاساپ.

كورمەدەن ورىن العان جۇزدەن استام شىعارماشىلىق جۇمىستىڭ اراسىندا تابيعي جانە قالالىق پەيزاجدار، ءتۇرلى-تۇستى ناتيۋرمورتتار، گرافيكالىق پورترەتتەر، لينوگراۆيۋرالار، ساندىك-قولدانبالى ونەر تۋىندىلارى، شاعىن مۇسىندىك پىشىندەر، كوللاجدار، اكريل قۇيۋ جانە فلوريستيكا تەحنيكاسىمەن سالىنعان سۋرەتتەر بولدى.

كەسكىندەۋ ونەرىن قاستەرلەۋشىلەردىڭ الەكساندر جانە نادەجدا بوليۋح، قۋات اسقاروۆ، حاينيسا مۇستافينا، يگور ساتايەۆ، ەلەنا مالەسكايا سياقتى تانىمال سۋرەتشىلەردىڭ كارتينالارىنا دەگەن ىقىلاسى زور بولدى. سونىمەن بىرگە كورمەدە عازيزا جۇبانوۆا اتىنداعى ونەر مەكتەبىنىڭ وقىتۋشىلارى مەن شاحتينسك قالاسىنىڭ كوركەمسۋرەت مەكتەبىنىڭ پەداگوگتەرى ۇسىنعان جۇمىستار دا كورمەگە كەلۋشىلەردىڭ ۇلكەن قىزىعۋشىلىعىن تۋدىردى. بۇل سۋرەتشىلەردىڭ قاتارىندا تۋىندىلارى تۇڭعىش رەت كورمەگە قويىلعان قىلقالام شەبەرلەرى دە بولدى.