توتەنشە جاعدايلار مينيسترلىگىنىڭ مالىمەتىنشە، 22 تامىز ساعات 8:00-دەگى جاعداي بويىنشا، توتەنشە جاعدايداعى ءورتتىڭ قارقىنى تومەندەمەدى، جاعدايدىڭ جاقسارۋى بايقالمايدى.
وسىعان بايلانىستى اپاتتىق ۋچاسكەنى گيپس جالعاستىرعىشپەن وقشاۋلاۋ تۋرالى شەشىم قابىلداندى، دەپ حابارلايدى Almaty-akshamy.kz. ءقازىر ءورت اۋىزدىقتالىپ جاتىر.
«وسىعان بايلانىستى شاحتاداعى اپاتتى جويۋ جونىندەگى شتاب باسشىلىعى اپاتتىق ۋچاسكەنى گيپس جالعاستىرعىش ورناتىپ، وقشاۋلاۋ تۋرالى شەشىم قابىلدادى. ولاردى ورناتاتىن ورىندار انىقتالىپ، ماتەريالدار جەتكىزىلۋ باستالدى. سودان كەيىن بارلىق كۇش-جىگەردى توتەنشە جاعداي ۋچاسكەسىن وقشاۋلاۋعا باعىتتاۋ جوسپارلانىپ وتىر»، دەپ جازىلعان توتەنشا جاعدايلار مينيسترلىگىنىڭ حابارلاماسىندا.
قايعىلى جاعدايدىڭ سەبەبىن انىقتاۋى ءتيىس ارنايى كوميسسيا ءالى جۇمىسقا كىرىسە الماي وتىر. "قازاقستان" شاحتاسىندا 5 كۇننەن بەرى ءورت ءالى جالعاسىپ جاتىر. سوعان بايلانىستى تەمپەراتۋرا جوعارى جانە كوزگە تۇك كورىنبەيدى.
17 تامىزدا قاراعاندى وبلىسىنداعى «ارسەلورميتتال تەمىرتاۋ» اق «قازاقستان» شاحتاسىندا ءورت شىقتى: كونۆەيەر لەنتاسى ورتەندى. جەر بەتىنە 222 كەنشى شىعارىلدى. تاعى بەس كەنشى جەر استىندا قالدى: تۇك كورىنبەگەندىكتەن ولاردى شىعارۋ مۇمكىن بولمادى.