پرەزيدەنت توتەنشە جاعداي كەزىندە جۇمىس ىستەگەن ەكىباستۇزدىقتاردى ماراپاتتادى.
بىلتىر 27 قاراشادا ەكىباستۇز قالاسىنداعى جىلۋ جەلىلەرىندە اپات بولىپ، 149 تۇرعىن ءۇي ءبىر مەزەتتە جىلۋسىز قالعان ەدى. بىردەن توتەنشە جاعداي جاريالانىپ، بارلىق كۇش اپات سالدارىن جويۋعا جۇمسالدى. سول سىن ساعاتتا باسپانالارعا قايتا جىلۋ بەرىلۋى ءۇشىن قاراپايىم جۇمىسشىلار ايانىپ قالمادى، دەپ حابارلايدى اlmaty-akshamy.kz inbusiness.kz-كە سىلتەمە جاساپ.
قيىن-قىستاۋ كەزەڭدە كۇنى-تۇنى ەڭبەك ەتكەن 50-گە جۋىق ازامات العىس ايتۋ كۇنى سىي-قۇرمەتكە بولەندى. پاۆلودار وبلىسىنىڭ اكىمى اسايىن بايحانوۆ ەكىباستۇز قالاسىنداعى «قاينار» دەمالىس–ءبىلىم بەرۋ كەشەنىندە وتكەن سالتاناتتى جيىندا ءار سالادا ەسەلى ەڭبەك ەتىپ جۇرگەن وبلىس تۇرعىندارىنا، بەلسەندى ازاماتتىق ۇستانىمىن ءبىلدىرىپ جۇرگەن جۇرتشىلىققا ريزاشىلىعىن ءبىلدىردى. اسىرەسە، قيىن-قىستاۋ كەزەڭدە ءبىر ءۇيدىڭ بالاسىنداي جۇمىلىپ، قالانى جىلۋمەن قامتۋعا بارىن سالعان جۇمىسشىلارعا، اۋىرتپالىققا توزىمدىلىك تانىتقان قالا تۇرعىندارىنا العىس ايتتى.
وسى ورايدا ەكىباستۇز قالاسىنداعى توتەنشە جاعدايدىڭ سالدارىن جويۋعا بەلسەندى قاتىسقان 19 ازاماتقا قازاقستان رەسپۋبليكاسى پرەزيدەنتىنىڭ جارلىعىنا سايكەس «ەرەن ەڭبەگى ءۇشىن» مەدالى تابىستالدى. ولاردىڭ قاتارىندا «زۋيەۆ» جەكە كاسىپكەرلىگىنىڭ سانتەحنيگى ۆلاديمير كۋزنەسوۆ بار. ول العاشقىلاردىڭ ءبىرى بولىپ جىلۋسىز قالعان تۇرعىن ۇيلەردىڭ جەرتولەسىندە جاعدايدى رەتتەۋ ءۇشىن جۇمىس ىستەدى.
«توعىز تاۋلىك بويى ۇيىقتاماۋ وڭاي بولعان جوق. قۇبىرلاردى جىلىتىپ، ءۇيدى جىلۋعا قايتا قوسىپ وتىردىق. ۇيگە تاڭ اتا ءۇستىمىز سۋ بولىپ ورالاتىنبىز. كەي كەزدەرى ۇيىمىزگە جەتكەنشە ول مۇز بوپ قاتىپ قالاتىن. تاۋلىگىنە ارى كەتسە ءبىر ساعات قانا ۇيىقتادىم. سەبەبى الاڭسىز جاتاتىن ۋاقىت بولعان جوق. ءقازىر سول قيىن كەزەڭ ارتتا قالدى. شىنى كەرەك، ونى ەسكە العىم دا كەلمەيدى»، - دەيدى ۆلاديمير كۋزنەسوۆ.
سونىمەن قاتار، 27 تۇرعىنعا پرەزيدەنتتىڭ العىس حاتى تابىستالدى. ال توتەنشە جاعداي كەزىندە جىلۋسىز قالعان تۇرعىنداردى تەگىن ىستىق تاماقپەن قامتىپ، قوناق ۇيدەن ورىن بەرگەن «Savoy» مەيرامحاناسىنىڭ ديرەكتورى شاتتىق سۇيىنىشيەۆا «وبلىس الدىندا سىڭىرگەن ەڭبەگى ءۇشىن» بەلگىسىمەن ماراپاتتالدى.