الماتى قالاسىنداعى Alatau creative hub ورتالىعىندا «اياگۇل» كىتابىنىڭ تانىستىرىلىمى جانە اياگۇل مانتاي شىعارماشىلىعىنا ارنالعان ادەبي كەش ءوتتى.
وسىدان ءبىر جارىم جىل بۇرىن ومىردەن مەزگىلسىز وتكەن تالانتتى جازۋشى، «سەرپەر» سىيلىعىنىڭ، پرەزيدەنت ستيپەندياسىنىڭ يەگەرى اياگۇل مانتاي شىعارماشىلىعىنا ارنالعان ادەبي كەشكە جۋرناليستەر، قالامگەرلەر، اياگۇلدىڭ دوستارى قاتىستى.
«اياگۇل شىعارمالارىنا تالداۋ جاساعان ەدىم. ونىڭ جازۋشىلىق دەڭگەيى جوعارى بولاتىن. جاستاردىڭ اراسىندا قالام ۇستايتىندار كوپ نەگىزى. ءبىراق سولاردىڭ بارلىعى مىقتى جازۋشى ەمەس قوي. تالابى جاقسى، نيەتى كۇشتى، ءبىراق تالانتى جەتپەيتىن قالام ۇستايتىندار دا بار. ال اياگۇل بولسا ادەبيەتكە، پروزاعا ءوزىنىڭ ۇنىمەن اقىرىن عانا اياڭداي باسىپ كەلىپ، وقىرمانداردىڭ جۇرەگىنەن ەرەكشە ورىن العان بولاتىن. تالانتتى ەڭبەكپەن ۇشتاستىرعان جازۋشى، جۋرناليست ەدى»، – دەيدى جازۋشى، عالىم نۇرداۋلەت اقىش.
الماتىداعى كەشتەن كەيىن قازاق ادەبيەتىندەگى قىزداردى قولداۋ ماقساتىندا «اياگۇل مانتاي اتىنداعى سىيلىق» بەرىلەتىن بولدى. بۇل تۋرالى اياگۇلمەن ءبىر توپتا بىرگە وقىعان جاستار اقىلداسىپ شەشكەن ەكەن. ءتىپتى كاسىپكەر، اياگۇلمەن جاقىن ارالاسقان باقتىگۇل قامباروۆا اتالعان سىيلىقتىڭ قارجىلاي جۇلدەسىن جىل سايىن بەرۋدى ءوز موينىنا الاتىنىن ايتتى.
«اياگۇلدىڭ كىتابىن شىعارۋعا اقىن، قوعام قايراتكەرى ماقپال مىسا ءوز ۇلەسىن قوستى. ول كىتاپتىڭ مۇقاباسىنا، بەزەندىرىلۋىنە دەيىن كوڭىل ءبولىپ، بار شارۋاسىن قاداعالاپ وتىردى. اقپان ايى ايا مانتاي فەنومەنىنە ارنالدى. 14 اقپان كۇنى كىتاپتىڭ تولىق تيراجىن الدىق، ءبىر ايدا ءۇش قالادا – استانا، شىمكەنت، الماتى قالالارىندا ءوتتى. ءار قالادا كەش وزىنشە وزگەشە ءوتتى. استانادا اياگۇلدىڭ بەينەسى كوبىرەك اشىلدى دەپ كەلدى وتكىزگەن قىزدار. شىمكەنتتە «اسىلىمىزدى ايالاي المادىق» دەپ جۇرگەن جەرلەستەرى سەزىمگە تولى، جىلى كەش وتكىزدى. ال الماتىداعى كەشتە نەگىزىنەن تالانتتىڭ تاعدىرىنا قوعامنىڭ اسەرىن كوبىرەك ايتتىق. اياگۇلدىڭ شىعارمالارى ارقىلى ەكىنشى ءومىرى باستالدى. قۇربىسى رەتىندە بويىمنان ءبىر اۋىر جۇك تۇسكەندەي جەڭىلدەدىم»، – دەيدى قۇربىسى بانۋ وڭداسىنوۆا.
«اياگۇل» دەپ اتالاتىن كىتاپتى اياگۇل مانتايدىڭ ومىردە جاقىن، سىرلاس دوسى بولعان بانۋ وڭداسىنوۆا قۇراستىرعان. كىتاپتىڭ ءبىرىنشى بولىمىندە اياگۇلدىڭ جاقىن ارالاسقان دوستارىنىڭ، ماسكەۋ جوعارى وقۋ ورنىندا بىرگە وقىعان دوستارى مەن قالامداستارىنىڭ ەستەلىكتەرى جانە اياگۇلدىڭ جۋرناليستەرگە بەرگەن سۇحباتتارى ەنگىزىلگەن. ەكىنشى بولىمدە اياگۇلدىڭ قالامىنان تۋعان بارلىق اڭگىمەسى بەرىلگەن.
