الماتىدا قوس الاياق جالعان حابارلاندىرۋمەن جۇرتتى الداپ كەلگەن

الماتىدا ەكى ازامات پاتەردى جالعا بەرەمىن، كولىك ساتامىن دەگەن جالعان حابارلاندىرۋلاردى ورنالاستىرعان. 

الماتى قالاسى المالى اۋدانىنىڭ پوليسيا قىزمەتكەرلەرى ەكى جاس كۇدىكتىنى ۇستادى، دەپ حابارلايدى Almaty-akshamy.kz.Polisia.kz-كە سىلتەمە جاساپ.

«الدىن الا بولجام بويىنشا، جامبىل وبلىسىنىڭ 19 جانە 20 جاستاعى تۇرعىندارى الداۋدىڭ “قاراپايىم” تىزبەگىن جاساعانىمەن، جاقسى تابىس تاپقان. جاستار سايتتا پاتەر جالعا بەرەمىز، كولىكتى نارىقتان تومەن باعاعا ساتامىز دەگەن جالعان حابارلاندىرۋلار ورنالاستىرعان. سودان كەيىن بانك كارتاسىنا الدىن الا تولەم جاساۋدى سۇراعان. الايدا اقشانى العاننان كەيىن ولار بايلانىسقا شىعۋىن توقتاتقان. جەدەل ىزدەستىرۋ ءىس-شارالارى بارىسىندا كۇدىكتىلەر ۇستالدى. تەرگەۋدىڭ وسى كەزەڭىندە ولاردىڭ 25 الاياقتىق ىسكە قاتىستىلىعى انىقتالدى. ولارعا قاتىستى سوتقا دەيىنگى تەرگەۋدىڭ ءبىرىڭعاي تىزىلىمىنە ق ر قك-نىڭ 190-بابى 2-بولىگى بويىنشا قىلمىستىق ءىس تىركەلدى. سونداي-اق ۇستالعانداردان ابونەنتتىك نومىرلەرى مەن ونلاين كارتالارىنا كىرۋ مۇمكىندىگى بار ەكى تەلەفون تاركىلەندى»، – دەدى المالى اۋداندىق پوليسيا باسقارماسىنىڭ باستىعى ەسەن ىسقاقوۆ.

ءقازىر كۇدىكتىلەر ۋاقىتشا ۇستاۋ يزولياتورىنا قامالدى. جەدەل ۋاكىلدەر الدانعانداردىڭ ودان دا كوپ بولۋى مۇمكىن ەكەنىن جوققا شىعارمايدى. سوندىقتان ولار ۇستالعانداردىڭ سۋرەتتەرىن مۇقيات قاراپ، ولاردى تانىعان جاعدايدا مىنا تەلەفون نومىرلەرىنە حابارلاسۋعا شاقىرادى: 8-705-555-77-63؛ 8-775-747-77-78؛ 8-778-481-19-00؛ 8-708-707-92-02. الماتى قالاسى پد. قىلمىستىق ءىستىڭ باسقا دا ءمان-جايلارى ق ر قپك-نىڭ 201-بابى جانە ق ر كونستيتۋسياسىنىڭ نورمالارىنا سايكەس جاريا ەتۋگە جاتپايتىنىن حابارلايدى.