پاۆلوداردا ۇيلەر سۇرىلە باستادى
ەرتىس وڭىرىندەگى زاتون شاعىن اۋدانىندا ورنالاسقان اپاتتى ۇيلەر سۇرىلە باستادى. الداعى جىلدارى وسى اۋماقتا بىرنەشە كوپقاباتتى ءۇي بوي كوتەرەدى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
شاعىن اۋدانداعى ەكى قاباتتى اعاش ۇيلەر وتكەن عاسىردىڭ 30-50ء-شى جىلدارى سالىنعان. ۋاقىت وتە كەلە كوممۋنالدىق جەلىلەرى ىستەن شىعىپ، اپاتتى دەپ تانىلعان. قۇلاۋدىڭ شاق الدىندا تۇرعان باسپانا يەلەرى بۇعان دەيىن جەرگىلىكت بيلىككە شاعىمدانىپ كەلگەن. بۇگىندە توبەسى وپىرىلىپ، قابىرعاسى سوگىلگەن پاتەرلەردىڭ كەيبىرەۋلەرى بوس تۇر. سەبەبى، تۇرۋعا قولايسىز. ال بارار جەرى، باسار تاۋى قالماعان ازاماتتار ءقاۋىپتى باسپانانى پانالاۋعا ءماجبۇر.
ءسۇرىلىپ جاتقان ۇيلەردىڭ كەيبىرەۋلەرى 1928 جىلى سالىنعان. قازىرگى ۋاقىتتا توزىعى جەتكەن پاتەرلەردە نە سۋ، نە جىلۋ جوق. اپاتتى ءۇي تۇرعىندارى بۇل كۇندەر ارتتا قالاتىنىنا سەنەر ەمەس.
جەكەمەنشىك قۇرىلىس كومپانيانىڭ وكىلى ءاليا ءجۇسىپوۆانىڭ ايتۋىنشا، الداعى جىلى ەكى كوپقاباتتى ءۇي بوي كوتەرەدى. 117 پاتەر قولدانىسقا بەرىلەدى.
«پاتەر يەلەرىنە ۋاقىتشا قونىس ۇسىنىلدى. قۇرىلىس جۇمىستارى اياقتالعان سوڭ بۇرىنعى پاتەرلەردىڭ اۋماعىنا سايكەس ءۇي بەرىلەدى. ءبىز تەك نىسان قۇرىلىسىنا جاۋاپتىمىز. ال جەرگىلىكتى اتقارۋشى ورگان ينجەنەرلىك كوممۋنيكاسيالاردى جەلىلەردى تارتۋعا ۋادە بەرىپ وتىر. بولاشاقتا بۇل شاعىن اۋداندا تاعى بىرنەشە ءۇي سالماقپىز. اۆتوتۇراق، بالالار ورتالىعى بولادى دەپ جوسپارلانعان. ازىرگە ۇيلەر ءسۇرىلىپ جاتىر. ال قۇرىلىس ءبىر ايدان سوڭ باستالادى»، - دەيدى ءاليا ءجۇسىپوۆا.
جاۋاپتى مەكەمە وكىلدەرىنىڭ حابارلايىنشا، ناقتى جوسپارلاۋ جوباسى ەكى اپتا بۇرىن بەكىتىلگەن. الداعى ۋاقىتتا 20 اپاتتى ءۇي بۇزىلادى. جەتى زاماناۋي ءۇي سالىنادى. كەشەندى جوبا ەندى جۇزەگە اسىرىلىپ جاتىر. قازىرگى ۋاقىتتا ينجەنەرلىك كوممۋنيكاسيالاردى تارتۋدى جوبالاپ جاتىر. ونىڭ اياسىندا شاعىن اۋدان اۋماعىندا بالالار شاعىن ورتالىعى، ويىن الاڭدارى قاراستىرىلعان.