سوتتالعان ايەل سىڭلىسىمەن كورىسەمىن دەپ ويلاعان جوق
شقو قىلمىستىق اتقارۋ جۇيەسىنە قاراستى №44 مەكەمە قىزمەتكەرلەرى 8 ناۋرىز كۇنى قارساڭىندا 15 جىل بۇرىن بىر-بىرىنەن كوز جازىپ قالعان ءاپالى-سىڭلىلى قىزداردىڭ كەزدەسۋىنە سەبەپشى بولعان. قايتا قاۋىشقان قىزداردىڭ ءبىرى اتالعان مەكەمەدە جازاسىن وتەپ ءجۇر، دەپ حابارلادى Almaty-akshamy.kz Elorda.info-عا سىلتەمە جاساپ.
شقو قاجد مالىمەتىنشە، جازاسىن وتەۋشى ايەل كۇيەۋىنەن قورعانامىن دەپ ابايسىزدا وعان دەنە جاراقاتىن سالعانى ءۇشىن ءىستى بولعان. سوتتالعان ايەلدىڭ سوزىنشە، ولار ۇيدە ءتورت اعايىندى بولعان - ءۇش قىز جانە ءبىر ەر بالا. وكىنىشكە قاراي، باۋىرى دۇنيەدەن ەرتە وزعان. ونىمەن كەزدەسۋگە تۇرمەگە الەنا ەسىمدى ءسىڭلىسى كەلدى. الەنا ءقازىر 22 جاستا، الماتىدا تۇرادى. تۇرمىس قۇرعان.
- سوتتالعان ايەل سىڭلىسىمەن كورىسەمىن دەپ ويلاعان جوق. مەكەمە قىزمەتكەرلەرى ونى سىڭلىسىمەن جولىقتىرۋدى جوسپارلى تۇردە ۇيىمداستىردى. استانادا تۇراتىن اپكەسىن ىزدەپ تاۋىپ، ونىڭ وسكەمەنگە ۇشاقپەن جەتۋىنە جاعداي جاسادى. سوتتالعان ايەل كولونيا اسحاناسىندا جۇمىس ىستەيدى. ونى اسحاناعا «كومەگىڭ كەرەك» دەپ شاقىرىپ الدىق. ونى سول جەردە كوپتەن بەرى كورمەگەن ءسىڭلىسى دە كۇتىپ تۇردى. ءبارىمىز كوزىمىزگە جاس الدىق، وتە اسەرلى بولدى. ولاردى كەزىندە اناسى بالالار ۇيىنە وتكىزگەن. سوتتالعان ايەلدىڭ جاسى ول كەزدە 12-دە، ودان كەيىنگى ءسىڭلىسى 3 جاستا، ال كەنجە ءسىڭلىسى ءبىر جارىم جاستا بولعان، - دەيدى شقو قاجد باسپا ءسوز حاتشىسى.
وسى رەتتە ۆەدومستۆو وكىلى سوتتالعان ايەلدىڭ كىشى ءسىڭلىسى قازىرگى ۋاقىتتا اۋرۋحانادا ەم الىپ جاتقاندىقتان كەزدەسۋگە كەلە الماعانىن اتاپ ءوتتى.
ايتا كەتەيىك، كولونيا قىزمەتكەرلەرى سوتتالعان ايەلدىڭ تۋعان سىڭلىلەرىن قاڭتار ايىندا تاۋىپ، بايلانىس ورناتقان. سودان بەرى ولار بىر-بىرىمەن تەلەفون ارقىلى سويلەسىپ تۇرادى.
- ەكەۋمىز بالالار ۇيىنە تۇسكەندە ەستيار بولدىق، مەنەن كەيىنگى قىز ءۇش جاستا بولدى. ال كىشى ءسىڭلىمىز نەبارى ءبىر جارىم جاستا بولاتىن. سوندىقتان ول ەمىس-ەمىس ەسىمدە. ءبىز وسىعان دەيىن تەلەفون ارقىلى اتا-انامىز تۋرالى سويلەستىك. الداعى ۋاقىتتا ايتار اڭگىمەمىز ءالى كوپ، - دەيدى ايەل.