ەلىمىزدە اۋرۋحانالاردىڭ قىزمەتكەرلەرى جىلىنا ءبىر رەت سوتتالماعاندىعى، سىبايلاس جەمقورلىق فاكتىلەرىنىڭ جوقتىعى تۋرالى انىقتاما تاپسىرۋدان بوساتىلدى.
بۇدان بىلاي بۇل انىقتامالاردى ءتيىستى ۆەدومستۆو ءبىرىڭعاي دەرەكتەر بازاسىنان الۋى ماسەلەسى قولعا الىندى، دەپ حابارلايدى Almaty-akshamy.kz.
بۇل تۋرالى ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين تەلەگرام ارناسىندا جازعان.
«ازاماتتارمەن سويلەسۋ بارىسىندا ءبىر اۋقىمدى ماسەلەگە كوزىم جەتتى. ماسەلە مىناداي. بارلىق اۋرۋحانالاردىڭ قىزمەتكەرلەرى جىلىنا ءبىر رەت سوتتالماعاندىعى تۋرالى، سىبايلاس جەمقورلىق فاكتىلەرىنىڭ جوقتىعى تۋرالى جانە باسقا دا انىقتامالاردى اكەلۋگە ءماجبۇر بولادى ەكەن. بۇنى ءبىرىڭعاي دەرەكتەر بازاسىنان الۋعا بولادى. وسى جەردە دەرەۋ سيفرلاندىرۋعا جاۋاپتى دەنساۋلىق ساقتاۋ ۆيسە-مينيسترىمەن حابارلاسىپ، ەرتەڭ وبلىستىق جانە قالالىق دەنساۋلىق ساقتاۋ باسقارمالارىنا وسى تالاپتاردىڭ كۇشىن جويۋدى تالاپ ەتىپ، ولاردىڭ كادرلىق قىزمەتتەرىنە، قاجەت بولعان جاعدايدا قىزمەتكەرلەردىڭ كەلىسىمى بويىنشا وسى انىقتامالاردى دەرەكقوردان سۇراتۋعا مۇمكىندىك بەرۋدى تاپسىردىم»، - دەيدى مينيستر استاناداعى سارىارقا اۋدانىنىڭ حالىققا قىزمەت كورسەتۋ ورتالىعىنا بارعان ساپارى جايلى حابارلاماسىندا.
سونداي-اق، باعدات مۋسين وندا كەلۋشىلەرگە ۇيدەن شىقپاي-اق قانداي قىزمەت تۇرلەرىن الۋعا بولاتىندىعى تۋرالى اقپارات بەرگەنىن اتاپ وتكەن. «اتاپ ايتقاندا، پسيحونيەۆرولوگيالىق، ناركولوگيالىق، سوتتىلىق بولۋى نەمەسە بولماۋىنا قاتىستى، ت.ب انىقتامالاردى eGov Mobile قوسىمشاسى ارقىلى جۇكتەي الادى»، - دەپ جازعان ول.